Украина Олий Радаси депутатлари 4 февраль куни ўтказилган мажлисда мамлакатнинг собиқ президентини расман президентликдан маҳрум қилиш бўйича қонун қабул қилди, деб хабар бермоқда «Kun.uz» ТАСС ахборотига таяниб.
Қайд этилишича, бу қонун лойиҳаси тасдиқланиши учун парламент депутатларининг 281 нафари овоз берган, қонун қабул қилиниши учун 226 овоз ҳам кифоя бўлар эди.
Хабарда маълум қилинишича, бундай қонун мамлакат тарихида илк бор қабул қилинди. Қонун ҳужжатида собиқ давлат раҳбари Виктор Янукович барча имтиёзларидан ва дахлсизлик ҳуқуқларидан ҳам маҳрум бўлгани кўрсатиб ўтилган.
Маълумот учун, Виктор Янукович 2010 йилнинг 25 февралида Украина президенти этиб сайланган эди. 2014 йилнинг 22 февралида Олий Рада унинг президентлик ваколатлари тугаганини маълум қилган.
Ушбу қонун лойиҳаси муаллифлари Януковични инсон ҳуқуқларини бузишда ва жазодан қочиб, мамлакат ҳудудини тарк этишда айблаб ўтди.
Қайд этиш жоиз, бу қонуннинг қабул қилиниши амалдаги Конституция бандларига мувофиқ эмас. Украина бош қонунига кўра, президент ваколатларининг эрта тугашига фақат президентнинг ўзи истеъфо бериши, соғлиғидаги муаммолар туфайли лавозимини бажара олмаслиги, импичментга учраши ёки вафот этишигина сабаб бўлиши мумкин, дейилади манбада.
Изоҳ (0)