Қозоғистон терма жамоаси 1−3 декабрь кунлари Тошкентда бўлиб ўтган футзал бўйича Tashkent Cup − 2014 халқаро турнири ғолибига айланди, деб хабар бермоқда Ўзбекистон Футбол Федерацияси матбуот хизмати.
3 декабрь куни Тошкентдаги «Ўзбекистон» спорт мажмуасида Tashkent Cup − 2014 халқаро турнирининг 3-тур баҳслари бўлиб ўтди. Турнирнинг сўнгги туридан ўрин олган илк ўйинда Қозоғистон ва Беларусь терма жамоалари ўзаро куч синашишди. Мазкур ўйинда Қозоғистон терма жамоаси ғолиб бўлган тақдирда, Ўзбекистон − Озарбайжон ўйини натижасидан қатъи назар турнир ғолибига айланарди. Ҳар иккала терма жамоа аъзолари ҳам анча очиқ ва чиройли ўйин намойиш этишди ва ўйин голларга бой бўлди. Учрашувнинг сўнгги дақиқасигача 3:3 ҳисоби қайд этилиб турган эди, аммо сўнгги дақиқада қозоғистонлик футзалчилар ғалаба тўпини киритишга муваффақ бўлишди. Ушбу ғалабадан сўнг, Қозоғистон терма жамоаси ўз очколари сонини 7 тага етказди ва Tashkent Cup − 2014 халқаро турнирининг бу йилги ғолибига айланди.
Куннинг иккинчи ўйинида эса, Ўзбекистон ва Озарбайжон терма жамоалари ўзаро баҳс олиб боришди. Мазкур ўйин ҳам голларга бой бўлди ва якунда Озарбайжон терма жамоасининг 6:3 ҳисобидаги ғалабаси билан тугади. Биринчи бўлимнинг илк дақиқаларида Озарбайжон термаси футзалчилари тезкор иккита гол уриб олдинга чиқиб олишди, аммо Баҳодир Аҳмедов шогирдлари бўлим ўртасида кетма-кет учта тўп киритиб биринчи бўлимни ғолиб сифатида тарк этишди - 3:2. Иккинчи бўлимда эса, Озарбайжон терма жамоаси аъзолари кўп вазиятларда устунлик қилишди ва 4 та гол уриб якунда ғалаба қозонишди - 6:3.
Шу тариқа, Ўзбекистон терма жамоаси 2 очко билан турнирда учинчи ўринни олди. Қозоғистон 7 очко билан турнир ғолибига айланган бўлса, Озарбайжон термаси 6 очко билан иккинчи ўринни қўлга киритди. Беларусь терма жамоаси эса турнирни 1 очко билан якунлади.
Турнир якунида терма жамоалар орасида энг яхшилар аниқланди ва улар турнир ташкилотчилари томонидан совғалар билан тақдирланишди. Қозоғистон терма жамоаси дарвозабони Игита эса, Tashkent Cup − 2014 турнирининг энг яхши ўйинчиси деб топилди.
Футзал. Tashkent Cup − 2014
3 декабрь
Беларусь − Қозоғистон 3:4
Ўзбекистон − Озарбайжон 3:6.
Изоҳ (0)