Низомий номидаги Тошкент давлат педагогика университетида янги «Эразмус Плюс» халқаро таълим дастурининг ахборот куни бўлиб ўтди, деб хабар бермоқда Ўзбекистон Миллий ахборот агентлиги.
Тадбир Ўзбекистон Республикаси Олий ва ўрта махсус таълим вазирлиги, Европа Иттифоқи делегацияси ва бошқа ташкилотлар ҳамкорлигида ташкил этилди. Унда Ўзбекистон олий ўқув юртлари, вазирлик ва идоралари вакиллари, Ўзбекистонда фаолият кўрсатаётган халқаро ташкилотлар ҳамда дипломатик миссиялар ходимлари иштирок этди.
Европа Иттифоқининг Ўзбекистондаги делегацияси раҳбари, элчи Й. Штерк, Тошкент давлат педагогика университети ректори Ш. Шарипов Президент раҳнамолигида таълим тизимида амалга оширилаётган кенг кўламли ислоҳотлар юксак натижалар бераётганини таъкидлади.
Тадбир ташкилотчиларининг сўзларига кўра, 2014—2020 йилларга мўлжалланган «Эразмус Плюс» дастурида олий таълим муассасаларининг иштироки янада самарали бўлади.
«Эразмус Плюс» Европа Иттифоқининг таълим, касб-ҳунар таълими ва спорт соҳасидаги дастури бўлиб, у турли мамлакатлар талабаларига Европа олий ўқув юртларида таълим олиш, университетлар ўқитувчиларига эса ўз малакасини ошириш имконини беради.
«Университетимиз Фарғона вилоятидаги академик лицей ва касб-ҳунар коллежлари ўқитувчиларининг малакасини ошириш, таълим, илм-фан ва ишлаб чиқаришни интеграциялаштириш бўйича икки лойиҳани муваффақиятли амалга оширди, — деди Фарғона давлат университети халқаро бўлим бошлиғи Ҳилола Сатторова. — Айни пайтда Европа олий ўқув юртлари билан алоқаларни янада мустаҳкамлаш устида ишламоқдамиз. Бу бакалавр ва магистрлар алмашиш, ўқитувчилар малакасини оширишга доир лойиҳани жорий этиш имконини беради».
Иштирокчиларга «Эразмус Плюс» дастури ва Ўзбекистон олий ўқув юртлари учун халқаро ҳамкорлик имкониятлари ҳақида атрофлича маълумотлар берилди.
Изоҳ (0)