Бугун,

  • USD 11095.31
  • RUB 173.84
  • EUR 10772.44

Соғлом бола йилида Сурхондарё вилоятида 151 километрдан ортиқ ички хўжалик йўллари таъмирланиб, қишлоқ аҳолисига қулай шароит яратилмоқда, деб хабар беради Ўзбекистон Миллий ахборот агентлиги.

Сурхондарё вилояти. Фото: ЎзА

Сурхондарё вилояти. Фото: ЎзА

Вилоятда 4835 километрдан ортиқ қишлоқ ички хўжалик йўллари мавжуд. Транспорт қатнови хавфсизлигини таъминлаш ва аҳолига қулай шароит яратиш мақсадида қишлоқларда яроқсиз ҳолга келган йўллар босқичма-босқич реконструкция қилиниб, тош-шағал, асфальт-бетон, цемент-бетон ва қора қопламали замонавий йўлларга айлантирилмоқда.

Бу йил Олтинсой туманидаги 11 маҳаллада ўн километрдан ортиқ ички йўлларни таъмирлаш режалаштирилган. Ҳозирга қадар йўлсозлар томонидан олти километрга яқин йўлда жорий таъмирлаш ишлари бажарилди. Бунинг учун 380 миллион сўмга яқин маблағ сарфланди. Тумандаги Бибизайнаб, Қоратепа, Сайрак қишлоқларида бу каби ишлар якунланган бўлса, Обшир, Оқарбулоқ, Гулистон, Дуғоба қишлоқларидаги ички йўлларга тош ётқизиш ишлари йил охирига қадар якунланади.

Бойсун туманида ўн километрдан ортиқ хўжаликлараро ички йўллар ҳолатини тубдан яхшилаш учун 865 миллион сўмга яқин маблағ ажратилган эди.

«Ана шу маблағ эвазига ўндан ортиқ қишлоқдаги ички йўллар жорий таъмирланди, — деди туман «Ободонлаштириш» давлат корхонаси раҳбари Ҳамид Бозоров. — Шўрсой, Бибиширин, Ариқусти сингари ўнга яқин маҳалланинг ички йўлларига қора қоплама ётқизилди. Пасурхи, Авлод, Тузбозор маҳаллаларидаги уч ярим километр ички йўл жорий таъмирланди».

Соғлом бола йилида Денов, Жарқўрғон, Музработ ва Ангор туманларида 45 километрга яқин ички йўллар сифатли таъмирланди.

«Сурхондарёавтойўл» ҳудудий йўллардан фойдаланиш ташкилотидан олинган маълумотларга кўра, айни кунларда қиш мавсумида автомобиль йўлларида транспорт хавфсизлиги ва узлуксизлигини таъминлаш борасида ҳам муайян чора-тадбирлар амалга оширилмоқда. Ана шу мақсадда йўллар назоратдан ўтказилиб, қопламалар таъмирланмоқда. Янги йўл белгиларини ўрнатиш, йўл ёқасини мустаҳкамлаш, кўприкларни таъмирлаш каби юмушларга ҳам алоҳида эътибор қаратилмоқда.

Изоҳ
Асосий янгиликлар
Маҳаллий
“Тез ёрдам машинаси 5 йилда икки бараварга кўпайди, битта чақирув дориси 640 сўмдан 7,5 минг сўмга ошди”. “Дарё” тиббиётдаги ўзгаришларни Наманган вилояти мисолида...
Спорт
Бундеслига. “Боруссия Д” ўз майдонида рақибини тор-мор этди 
Шоу-бизнес
Instagram: Аэропортда дабдаба билан кутиб олинган Liil Хуррамов, қўшиқ куйлаган Абдуҳошим Исмоилов, янги раққосаларни кашф этаётган Юлдуз Усмонова