Украина президентлигига номзодлардан бири Олег Царёв Киевда қаттиқ калтакланди, айни пайтда у оғир аҳволда ётибди. Бу ҳақда унинг сайтида берилган хабарга асосланиб, «ИТАР-ТАСС» маълум қилди.
Маълум бўлишича, ICTV канали орқали бўлган тўғридан-тўғри эфирдан сўнг телеканал биносини тарк этаётган маҳал, Олег Царёв қуролланган тажовузкор оломон ҳужумига учраган. Давлат мудофааси ходимлари уни қийинчилик билан ажратиб олиб, тез ёрдам машинасига ўтқизишган. Намойишчилар «Тез ёрдам»ни ўтказиб юбормагач, бошқа автомобилда уни олиб кетишган.
Царёв ICTV каналининг «Сўз эркинлиги» кўрсатувида қатнашган. Маҳаллий ОАВлар хабарига кўра, худди шу бино ёнида президентликка номзодлардан яна бири Михаил Добкинга ҳам ҳужум қилиб, «зелёнка» ва ун сепишган.
Кейинроқ Царёв уни «ҳеч қандай вазият, жумладан жисмоний таҳдидлар ҳам номзодликдан воз кечишга мажбур қила олмаслигини» таъкидлади.
Изоҳ (0)