Россия президенти Владимир Путин АҚШ президенти Барак Обама билан телефон суҳбатида уни Украинада куч ишлатилиши ва қон тўкилиши олдини олишда Америка томонида мавжуд барча имкониятларни ишга солишга чақирди. Бу ҳақда «ИТАР-ТАСС» хабар берди.
Путин Украинанинг Донецк, Харьков, Луганск, Славянск ва бошқа жануби-шарқий шаҳарларидаги норозилик ҳаракатлари Киевдаги раҳбариятнинг рус ва рус тилли аҳоли манфаатларини ҳисобга ола билмаслигидан келиб чиққанини таъкидлади.
Шунингдек, Россиянинг Украинадаги воқеаларга аралашувига Обаманинг билдирган ташвишига жавобан, Россия президенти бундай маълумотларнинг асоссиз эканини айтди.
«Украинанинг ҳозирги ҳукумати биринчи навбатда барча сиёсий кучлар ва ҳудудларни фуқаролар ҳуқуқ ва эркинликларини, мамлакат федератив тузилишини кафолатлайдиган янги конституция ишлаб чиқиш жараёнига жалб этишни ўйлаши керак », — деди Путин.
Мамлакат раҳбарлари 2014 йил 17 апрелда Женевада бўлиб ўтадиган тўрт томонлама (Евроиттифоқ, Россия, АҚШ, Украина) учрашув арафасида Укараинадаги вазият юзасидан дипломатик ҳамкорлик йўлларини қидириш бўйича музокараларни давом эттиришга келишиб олди.
Изоҳ (0)