Қрим республикаси Давлат кенгашининг навбатдан ташқари йиғилишида унинг конституцияси тасдиқланди. Асосий қонуннинг қабул қилинишини ёқлаб 87 нафар депутат овоз берди, деб ёзади «ИТАР-ТАСС».
Қрим конституцияси 10 боб ва 95 моддадан иборат, унинг асосий қоидалари Россия конституцияси билан ўзаро ўхшаш. Асосий қонун матнида кўрсатилишича, Қрим республикаси Россия Федерацияси таркибидаги демократик, ҳуқуқий давлатдир. Қрим республикаси ҳукуматининг манбаси унинг халқи – кўпмиллатли РФ халқининг бир қисмидир.
Конституцияда таъкидланишича, «халқ иродасининг бевосита олий ифодаланиш шакли референдум ва эркин сайловлардир». Ҳукуматни куч билан тортиб олиш ва ҳукумат ваколатларини суиистеъмол қилишга йўл қўйилмайди, дейилади унда.
Асосий қонунда кўрсатилишича, рус тили, украин тили ва қрим-татар тили Қрим республикасининг давлат тиллари ҳисобланади.
Ҳужжат матнига кўра, энг олий лавозимли шахс республика раҳбари бўлиб, у Қрим Давлат кенгаши депутатлари томонидан беш йил муддатга сайланади. Бир киши бу лавозимда кетма-кет икки муддатдан ортиқ ўтира олмайди. Конституцияда республика Давлат кенгаши 75 нафар депутатдан иборат бўлиши белгиланган; ҳозирда эса парламентда улар сони 100 нафарни ташкил этади. Парламентнинг ваколат муддати – беш йил.
Изоҳ (0)