Qrim respublikasi Davlat kengashining navbatdan tashqari yig‘ilishida uning konstitutsiyasi tasdiqlandi. Asosiy qonunning qabul qilinishini yoqlab 87 nafar deputat ovoz berdi, deb yozadi “ITAR-TASS”.
Qrim konstitutsiyasi 10 bob va 95 moddadan iborat, uning asosiy qoidalari Rossiya konstitutsiyasi bilan o‘zaro o‘xshash. Asosiy qonun matnida ko‘rsatilishicha, Qrim respublikasi Rossiya Federatsiyasi tarkibidagi demokratik, huquqiy davlatdir. Qrim respublikasi hukumatining manbasi uning xalqi – ko‘pmillatli RF xalqining bir qismidir.
Konstitutsiyada ta’kidlanishicha, “xalq irodasining bevosita oliy ifodalanish shakli referendum va erkin saylovlardir”. Hukumatni kuch bilan tortib olish va hukumat vakolatlarini suiiste’mol qilishga yo‘l qo‘yilmaydi, deyiladi unda.
Asosiy qonunda ko‘rsatilishicha, rus tili, ukrain tili va qrim-tatar tili Qrim respublikasining davlat tillari hisoblanadi.
Hujjat matniga ko‘ra, eng oliy lavozimli shaxs respublika rahbari bo‘lib, u Qrim Davlat kengashi deputatlari tomonidan besh yil muddatga saylanadi. Bir kishi bu lavozimda ketma-ket ikki muddatdan ortiq o‘tira olmaydi. Konstitutsiyada respublika Davlat kengashi 75 nafar deputatdan iborat bo‘lishi belgilangan; hozirda esa parlamentda ular soni 100 nafarni tashkil etadi. Parlamentning vakolat muddati – besh yil.
Izoh (0)