Таллин порти «Ўзташқитранс» билан шартнома имзолади

Естония Республикаси ташқи ишлар вазири Урмас Паэт бошчилигидаги ишбилармон доиралар вакилларининг Ўзбекистонга ташрифи доирасида транспорт соҳасида шартнома имзоланди. Бу ҳақда «Ведомости.ее» хабар берди.

Ушбу шартнома Таллин порти ва Ўзбекистоннинг «Ўзташқитранс» транспорт корхонаси ўртасида тузилди.

Таллин порти бошқаруви аъзоси Аллан Кийл ушбу ташриф кутилмаганда омадли бўлганини таъкидлади. «Ташриф чоғида логистика марказлари, маҳсулот ташувчилар ва маҳсулот эгалари билан суҳбатлашишга эришдим. Учрашувларнинг кўпчилиги Ўзбекистон томон алоқаларни мустаҳкамлаш тарафдори эканини кўрсатди», — деди у.

Маълумот ўрнида: Таллин порти Эстониянинг энг йирик порт ташкилотидир. У ўз ичига бешта портни олувчи давлат ташкилоти ҳисобланади.