Tallin porti “O‘ztashqitrans” bilan shartnoma imzoladi

Estoniya Respublikasi tashqi ishlar vaziri Urmas Paet boshchiligidagi ishbilarmon doiralar vakillarining O‘zbekistonga tashrifi doirasida transport sohasida shartnoma imzolandi. Bu haqda “Vedomosti.ee” xabar berdi.

Ushbu shartnoma Tallin porti va O‘zbekistonning “O‘ztashqitrans” transport korxonasi o‘rtasida tuzildi.

Tallin porti boshqaruvi a’zosi Allan Kiyl ushbu tashrif kutilmaganda omadli bo‘lganini ta’kidladi. “Tashrif chog‘ida logistika markazlari, mahsulot tashuvchilar va mahsulot egalari bilan suhbatlashishga erishdim. Uchrashuvlarning ko‘pchiligi O‘zbekiston tomon aloqalarni mustahkamlash tarafdori ekanini ko‘rsatdi”, — dedi u.

Ma’lumot o‘rnida: Tallin porti Estoniyaning eng yirik port tashkilotidir. U o‘z ichiga beshta portni oluvchi davlat tashkiloti hisoblanadi.