O‘zbekistondagi 208 ta tuman va shahar Obodonlashtirish boshqarmalarida ichki yo‘llarni saqlash xizmatlari tashkil qilinishi rejalashtirilmoqda

Prezident Shavkat Mirziyoyev 5-avgust kuni ichki yo‘llarni saqlash va taʼmirlashga oid takliflar taqdimoti bilan tanishdi. Bu haqda Prezident matbuot xizmati xabar berdi.

Mamlakatda jami 184 ming 582 kilometr avtomobil yo‘li bor. Shundan qariyb 142 ming kilometri ichki xo‘jalik yo‘llaridir.

So‘nggi to‘rt yilda ichki yo‘llarni qurish va taʼmirlashga 15 trillion so‘m ajratilgan. Mahallalarda, chekka qishloqlarda ham ko‘chalar ravon bo‘lib, aholi farovonligiga xizmat qilmoqda. Lekin ularni saqlashga masʼul tizim yo‘q.

Chunki Avtomobil yo‘llari qo‘mitasi davlat va xalqaro ahamiyatdagi yo‘l va ko‘priklar bilan shug‘ullanadi. Ichki yo‘l va ko‘priklar esa mahalliy hokimliklar balansida. Hozirgi kunda 43 ming kilometr ichki yo‘llar taʼmirtalab holatda, 2 ming 354 ta ko‘prikning “egasi” aniq emas.

Shu bois tuman darajasida bu masalalarga masʼul tizim yaratish rejalashtirilmoqda. Taklifga ko‘ra, 208 ta tuman va shahar Obodonlashtirish boshqarmalarida ichki yo‘llarni saqlash xizmatlari tashkil qilinadi. Ular eng zarur 4 turdagi maxsus texnika bilan taʼminlanadi. Buning uchun byudjetdan tegishli mablag‘ ajratish ko‘zda tutilmoqda.

Tahlillarga ko‘ra, yo‘llarni saqlashga yo‘naltirilgan mablag‘ taʼmirlash xarajatini bir necha barobar qisqartiradi. Agar o‘z vaqtida pul ajratilib, ichki yo‘llar to‘g‘ri ekspluatatsiya qilinsa, ularni taʼmirlash muddatlari ham kamida 2 barobar uzayadi.

Shu bois mutasaddilarga ichki yo‘llarni saqlash va taʼmirlashni moliyalashtirish bo‘yicha yangi mexanizmlarni joriy etish bo‘yicha ko‘rsatma berildi. Aholi talabidan kelib chiqib, ichki yo‘llarni taʼmirlash va yangilarini qurish ishlarini davom ettirish zarurligi taʼkidlandi.