2025-yil 1-iyun holatiga ko‘ra, Toshkent shahrida issiq suv va issiqlik taʼminoti uchun umumiy qarzdorlik 353 milliard so‘mga yetgan. Bu haqda Veolia Energy Tashkent kompaniyasining moliyaviy masalalar bo‘yicha direktori Sevara Pardayeva “Daryo”ga maʼlum qildi.
Taʼkidlanishicha, poytaxt aholisi issiq suv va issiqlik taʼminoti xizmatidan jami 278 milliard so‘m qarzdor. Qolgan 75 milliard so‘mlik qarzlar byudjet tashkilotlari va yuridik shaxslarga tegishli.
“Issiq suv va issiqlik taʼminotidan qarzini qaytarmayotgani uchun 90 foiz isteʼmolchilarni sudga berishga majbur bo‘ldik. Ular sud qog‘ozi kelmaguncha issiq suv uchun pul to‘lashni o‘ylamayapti. Agar aholi pul to‘lamasa, biz 60 kun kutib, muddati o‘tgan qarzdorlik bo‘yicha sudga oshirishimiz mumkin. Sud masalani ko‘rib chiqib, MIBga oshiradi. Pulni qarzdor odamlar yoki yuridik shaxsdan undirguncha kamida 6–8 oy vaqt ketadi. Bu holat quvurlarni taʼmirlash, almashtirish va boshqa ish faoliyatlarimizga taʼsir qiladi”, dedi kompaniya vakili.
Sevara Pardayevaning aytishicha, shaharning ayrim hududlariga 11,5 mingta onlayn suv hisoblagich o‘rnatilgan. Joriy yil yana 75 mingta o‘rnatish rejalashtirilgan. Bu ishlar asosan Mirzo Ulug‘bek, Olmazor va Sergeli tumanlarida malga oshiriladi.
“Issiq suv va issiqlik taʼminoti isteʼmolchilari soni 450 mingta bo‘lib, hisoblagichlar 600 mingta. Shundan 430 mingtasi va umumiy isteʼmolchilarning 90 foizi aholi hisoblanadi”, dedi kompaniya masʼuli.
Korxona vakillari issiq suv quvurlariga elektron hisoblagichlar o‘rnatilayotgani sabablardan biri ham qarzdorlikni kamaytirish ekanini maʼlum qildi. Lekin bunday hisoblagichlar butun shahardagi binolarga o‘rnatilmasligi, asosan qarzdorligi yuqori tumanlarga joriy etilishi taʼkidlandi.
Izoh (1)
faqat bir tomonlama yondoshgan insofsiz issiq suvga asossiz qarzdorlik yozadigan tashkilotlar xam bor mana masalan menga issiq tizimidan mendan oldingi uydi egasini qarzlarini hamda tulaganimda keyin ham takroriy qarzdorlik yuq joyga sud qarori chiqartirdi