UzTest Buxoro viloyati hududiy filialida Germaniyadan O‘zbekistonga olib kelingan 3 dona sinov laboratoriya jihozining biri yo‘qolib qolgani haqida xabar berilgandi. Ilmiy-sinov va sifat nazorati markazi holat yuzasidan ma’lumot berdi.
Keltirilishicha, haqiqatan ham UzTest Buxoro hududiy filialida qiymati 150 million so‘mlik “Tormoznoy stend” sinov uskunasi hamda 250 million so‘mlik gazballonlarni o‘lchash vositalari o‘g‘irlangan. Mazkur holat, aslida, O‘zbekiston texnik jihatdan tartibga solish agentligi Komplayens nazorat bo‘limi tomonidan o‘tkazilgan o‘rganishlar davomida aniqlangan.
Bu haqda hujjatlar 2024-yil noyabr oyida Buxoro viloyati huquqni muhofaza qilish idoralariga yuborilib, aniqlangan holat yuzasidan surishtiruv ishlari olib borilayotgani ma’lum qilindi.
Shuningdek, O‘zbekiston ilmiy-sinov va sifat nazorati markazida (UzTest) 6 mlrd so‘m mablag‘ni maqsadsiz sarflab yuborilgani iddao qilingan xabarlar inkor qilindi. Agentlik Komplayens nazorati bo‘limi tomonidan tizim tashkilotlari, shu jumladan, Markazning moliyaviy faoliyati ustidan doimiy monitoring o‘rnatilgani qayd etildi.
O‘zA ushbu holat yuzasidan izoh so‘rab, “O‘zbekiston ilmiy sinov va sifat nazorati markazi” DM masʼullarga so‘rov yuborgan.
Izoh (0)