O‘zbekiston prezidenti yordamchisi Saida Mirziyoyeva Qozog‘istonga tashrif doirasida Qozog‘iston prezidenti administratsiyasi rahbari Aybek Dadebay bilan uchrashdi.
Ma’lum qilinishicha, 6-avgustdagi uchrashuv davomida O‘zbekiston–Qozog‘iston hamkorlik munosabatlarining ustuvor yo‘nalishlaridagi mavjud holat va istiqbollar, aloqalarni yanada rivojlantirish bo‘yicha erishilgan kelishuvlar hamda davlat rahbarlari tomonidan berilgan topshiriqlar ijrosining borishi muhokama qilindi.
Shu kuni Saida Mirziyoyeva Qozog‘iston davlat maslahatchisi Yerlan Karin bilan ham uchrashuv o‘tkazgandi. Unda ikki tomonlama, mintaqaviy va ko‘p tomonlama munosabatlarning dolzarb masalalari ko‘rib chiqilgandi. 5-avgust kuni Saida Mirziyoyeva Qozog‘iston prezidenti Qosim-Jo‘mart To‘qayev bilan uchrashib, mintaqaviy va xalqaro kun tartibini atroflicha muhokama qilgandi.
Ushbu uchrashuvlar Shavkat Mirziyoyevning Qozog‘istonda davlat tashrifi arafasida o‘tkazildi. O‘zbekiston prezidenti ushbu haftada Qozog‘istonga boradi. Davlat rahbari Ostona shahrida Markaziy Osiyo davlatlari rahbarlarining navbatdagi Maslahat uchrashuvida ishtirok etishi rejalashtirilgan.
Izoh (0)