Ўзбекистон президенти ёрдамчиси Саида Мирзиёева Қозоғистонга ташриф доирасида Қозоғистон президенти администрацияси раҳбари Айбек Дадебай билан учрашди.
Маълум қилинишича, 6 августдаги учрашув давомида Ўзбекистон–Қозоғистон ҳамкорлик муносабатларининг устувор йўналишларидаги мавжуд ҳолат ва истиқболлар, алоқаларни янада ривожлантириш бўйича эришилган келишувлар ҳамда давлат раҳбарлари томонидан берилган топшириқлар ижросининг бориши муҳокама қилинди.
Шу куни Саида Мирзиёева Қозоғистон давлат маслаҳатчиси Ерлан Карин билан ҳам учрашув ўтказганди. Унда икки томонлама, минтақавий ва кўп томонлама муносабатларнинг долзарб масалалари кўриб чиқилганди. 5 август куни Саида Мирзиёева Қозоғистон президенти Қосим-Жўмарт Тўқаев билан учрашиб, минтақавий ва халқаро кун тартибини атрофлича муҳокама қилганди.
Ушбу учрашувлар Шавкат Мирзиёевнинг Қозоғистонда давлат ташрифи арафасида ўтказилди. Ўзбекистон президенти ушбу ҳафтада Қозоғистонга боради. Давлат раҳбари Остона шаҳрида Марказий Осиё давлатлари раҳбарларининг навбатдаги Маслаҳат учрашувида иштирок этиши режалаштирилган.
Изоҳ (0)