Samarqandning yoshiga doir ma’lumotlar qayta ko‘rib chiqilib, 3000 yil deb qayta baholanadi. Bu haqda Xalq deputatlari Samarqand viloyati kengashining 24-iyulda o‘tkazilgan navbatdagi sessiyasida qaror qabul qilindi.
“Samarqandning qadimiy o‘rni va yoshini o‘rganish 150 yildan ortiq vaqtdan buyon davom etib, shahar dastlab bundan 1500 yil oldin, keyinchalik 2000 ming yil, 1970-yilda 2500 yil oldin shakllanganligi borasida xulosalarga kelingan edi. 2000-yillarda esa O‘zbekiston—Fransiya qo‘shma ekspedisiyasi yangi ma’lumotlarni aniqladi va Samarqand yoshi 2750 yil deb tasdiqladi. Lekin bu ham yakuniy xulosa emas va shuning uchun shaharning xronologiyasi bo‘yicha tadqiqotlar keyingi yillarda ham davom etib kelmoqda. Xususan, joriy yildagi qazishma ma’lumotlari Samarqand shahridan 25 kilometr uzoqlikdagi Ko‘ktepa yodgorligida 1993—2006-yillarda olib borilgan qazishma ishlarining tahlili asosida mutaxassislar tomonidan yangi qarashlar shakllanishiga turtki berdi”, degan sessiyada so‘zga chiqqan Samarqand Arxeologiya instituti direktori Mo‘minxon Saidov.
O‘zAning xabar berishicha, 2025-yil boshida viloyat hokimi tashabbusi bilan Samarqandning tarixi, madaniyati, me’moriy va arxeologik yodgorliklarini o‘rganish maqsadida hokimlik huzurida jamoatchilik kengashi tashkil qilinganddi. Taniqli tarixchi va arxeolog olimlar, ziyolilardan iborat kengash a’zolari bir necha yo‘nalishlarda tadqiqot ishlarini olib borishga kirishdi.
Samarqand shahrining yoshiga aniqlik kiritishga mas’ul guruh Afrosiyob va Ko‘ktepa yodgorliklarida, hozirgi Ko‘ksaroy maydoni o‘rnida bo‘lgan Amir Temur arkida fanlararo tadqiqot usullarini qo‘llash orqali kompleks qazuv ishlarini amalga oshirdi.
O‘zbekiston—Fransiya qo‘shma ekspedisiyasi a’zolari tomonidan shu vaqtga qadar Ko‘ktepa va Afrosiyobda topilgan materiallarni qayta tahlil qilish orqali Samarqand shahrining shakllanish davri 3000 yilga teng ekanligi borasida fikr ilgari surildi. Qayd qilinishicha, miloddan avvalgi I ming yillik boshlarida, ya’ni bundan 3000 ming yil oldin bu yerda shahar hokimi qarorgohi va ibodatxonani o‘z ichiga olgan yirik shahar shakllangan.
Sessiyada Fanlar akademiyasi, Samarqand arxeologiya instituti va xalqaro hamkor tashkilotlar tomonidan olib borilgan tadqiqotlar natijalari bo‘yicha Samarqand shahrining ilk urbanizatsiyasi miloddan avvalgi II minginchi yillik oxiri va I minginchi yillik boshlariga taalluqli ekanligi haqidagi taqdimot materiallarini ma’lumot uchun qabul qilish, Afrosiyob va Ko‘ktepa hududlarida olib borilgan arxeologik qazishmalar natijasida topilgan osori-atiqalar, ilmiy ma’lumotlar va hujjatlarni tegishli vazirlik va idoralarga taqdim etish bo‘yicha qaror qabul qilindi.
Izoh (0)