Saudiya Arabistonining top klublaridan biri — “Al-Hilol” Italiyaning “Napoli” klubi hujumchisi Viktor Osimhen uchun yana bir bor shartnoma taklif qildi. Bu haqda Goal nashriga tayanib Championat xabar berdi.
Manbaga ko‘ra, klub nigeriyalik futbolchiga yiliga 50 million yevro miqdorida maosh taklif qilgan. Bungacha 26 yoshli hujumchi “Al-Hilol”ning 30 million yevrolik dastlabki taklifini rad etgan edi. Shuningdek, saudiyaliklar rahbariyati Viktorni qo‘lga kiritish uchun “Napoli” klubiga 75 million yevro miqdorida tovon puli to‘lashga tayyorligini bildirgan.
Hozircha muzokaralar davom etmoqda. Agar futbolchi ushbu shartnomaga rozi bo‘lsa, bitim imzolanishi mumkin. Aks holda, riyodliklar transferdan voz kechishi yoki yanada yaxshilangan taklif bilan chiqishi mumkinligi aytilmoqda.
O‘tgan mavsumda Osimhen Turkiyaning “Galatasaroy” jamoasida ijarada to‘p surgan. U barcha musobaqalar doirasida 41 o‘yinda maydonga tushib, 37 ta gol va 8 ta golli uzatma muallifiga aylangan.
Futbolchining “Napoli” bilan amaldagi shartnomasi 2026-yilning yozigacha mo‘ljallangan. Transfermarkt portali hujumchining bozor qiymatini 70 million yevroga baholagan.
Izoh (0)