Rossiyaning beshta hududidagi strategik aerodromlarga FPV-dronlar bilan zarba berildi. Frontdan 1 800 km masofada joylashgan Murmanskning Olenya havo bazasi hamda jabhadan 4 400 km uzoqlikdagi Irkutsk viloyatining Belaya aerodromi shular jumlasidan. Hujum nishoni yadroviy triadaning bir qismi hisoblangan, ya’ni ommaviy qirg‘in qurollarini tashishga mo‘ljallangan strategik bombardimonchilar bo‘ldi. Rossiya qo‘mondonligi ulardan Ukrainaga uzoq masofali raketalar uchirishda foydalanib kelardi.
Tarmoqlarda tarqalayotgan videolarda portlash va tutun tasvirlari aks etgan. Keyinroq dron operatorlari tomonidan yozib olingan kadrlar ham e’lon qilindi. Ulardan eng kami 4 ta Tu-95MS strategik bombardimonchisiga zarba berilganini ko‘rish mumkin. Ushbu modeldagi samolyotlar kamyob bo‘lib, har biri taxminan 60 mln dollarga baholanadi.
Biroq talafotlar shu bilan cheklanmaydi. Keyinroq Ukraina nashrlari xavfsizlik manbalariga tayanib, amaliyot natijasida jami 40 ga yaqin samolyot yo‘q qilingan yoki shikastlangani, umumiy zarar esa 2 mlrd dollarga baholanishi haqida yozib chiqdi. Shuningdek, Tu-90MS strategik bombardimonchisiga qo‘shimcha ravishda Tu-22M3 va A-50 samolyotlari ham nishonga olingani ma’lum qilindi.
Mazkur amaliyot Ukraina xavfsizlik xizmati tomonidan “O‘rgimchak to‘ri” deya nomlangan bo‘lib, unda FPV-dronlardan foydalanilgani alohida diqqat tortdi. Boisi bu turdagi uchuvchisiz uchish qurilmalari atigi 5-15 km masofaga parvoz qilishi mumkin. Biroq nisbatan kichik hajmi sabab ularni yashirib o‘tish, garchand murakkab bo‘lsa-da, imkonli hisoblanadi.
Voqeadan ko‘p o‘tmay dronlar yuk mashinasidan uchib chiqqani ma’lum bo‘ldi. Keyinroq Murmanskning Olenogorsk shahrida yuk mashinasi haydovchilaridan biri ushlangani, biroq uning o‘zi nima olib ketayotganidan bexabar bo‘lgani haqida xabar qilindi.
Tasdiqlanmagan xabarlarga ko‘ra, FPV-dronlarni aerodrom yaqiniga olib borishda foydalanilgan konteyner missiya yakunlanib bo‘lgach o‘zini portlatib yuborgan. Bundan maqsad uchuvchisiz uchish qurilmalarini minglab kilometr masofadan turib boshqarishga imkon bergan texnologiya va boshqa izlarni yashirish bo‘lishi mumkin.
Rossiya Ukrainaning uzoq masofali kamikadze dronlari tahdidi sabab o‘z strategik aviatsiyasini frontdan minglab kilometr uzoqqa ko‘chirgan edi. Biroq har biri yuzlab million dollar turadigan samolyotlarning atigi 500-1000 dollar turadigan FPV-dronlar bilan yo‘q qilinishi strategik obyektlarning muhofazasi bilan bog‘liq kamchiliklarni ochib beradi. Qolaversa, o‘nlab, ehtimol yuzlab qurollangan dronlarning mamlakat ichida bemalol olib yurilishiga yo‘l qo‘ygan, bunday xavfni vaqtida bartaraf eta olmagan Rossiya Federal xavfsizlik xizmati faoliyatiga ayrim savollar paydo bo‘ladi.
Nishonga olingan samolyotlar haqida
“O‘rgimchak to‘ri” amaliyoti doirasida nishonga olingan Tu-95MS hamda Tu-22M3 strategik bombardimonchilari yadroviy triadaning bir qismi hisoblanadi. Ulardan birinchisi qariyb 60 million, ikkinchisi esa 100 million AQSH dollariga baholanadi.
Biroq gap samolyotlarning narxida emas, balki Rossiyada ularning o‘rnini egallash uchun aktiv yo‘qligida. Boisi ularni ishlab chiqarish allaqachon to‘xtatilgan. Zamonaviy rus harbiy sanoati esa bunday murakkab texnologiyani ishlab chiqarishga ortiq qodir emas.
Izoh (0)