Kuchli magnit bo‘roni sabab ikki sutkadan so‘ng sharqiy yarimshardagi seysmik mintaqalardan birida 7 magnitudan yuqori kuchli zilzila bo‘lishi xavfi oshayotgani haqida xabarlar tarqaldi. FVV buni rad etdi.
“Shuni ma’lum qilamizki, seysmik faollik magnit bo‘roniga bog‘liq hodisa emas. Shuningdek, zilzila vujudga kelishi mumkin bo‘lgan aniq vaqt va joyini prognoz qilishning imkoni yo‘q”, deyiladi vazirlik xabarida.
Ma’lum qilinishicha, FVV Seysmoprognostik monitoring markazi tomonidan olib borilayotgan o‘rganishlar natijasiga ko‘ra O‘zbekiston hududida kuchli zilzilalarni ko‘rsatuvchi anomal o‘zgarishlar aniqlanmagan.
Shu sababli FVV fuqarolardan asossiz ma’lumotlarga ishonib xavotirga tushmasliklarini so‘radi.
Iqlimshunos olim Erkin Abdulahatovning yozishicha, olimlar sayyorda 6—8 ball davomli magnit bo‘ronidan ikki sutka o‘tib, bizning yarimsharda kuchli 7 magnitudan yuqori zilzila bo‘lishi mumkinligini ilmiy isbotlagan. Ko‘p zilzilalarda bu aniqlanmagan bo‘lsa-da, ko‘plarida bu tamoyil mos tushgan.
Chunki, Yevrosiyo materigi, Okeaniyadagi seymik mintaqalarda juda ko‘p 7 magnitudadan yuqori kuchli zilzilar kuzatilishidan oldin sayyorada 6—8 ball davomli magnit bo‘roni qo‘zg‘algan.
Zilzilani oldindan yuqori aniqlikda prognoz qilish usuli dunyoda hali ham yaratilmadi.
Izoh (0)