Statistika agentligi O‘zbekistonda joriy yil yanvar–iyun oylarida qayd etilgan o‘limlar soni va sabablarini maʼlum qildi.
Birinchi yarim yillikda respublikda vafot etganlar soni 81,4 ming kishini tashkil etdi (2023-yil mos davrida 79,6 ming kishi). Shundan erkaklar 44,4 ming kishini, ayollar 37 ming kishi bo‘ldi. Yanvar–iyun oylarida hayotdan ko‘z yumganlar soni shaharlarda 46 mingtaga, qishloqlarda 35,4 mingtaga yetdi.
Mamlakatda olti oy ichidagi eng ko‘p o‘limlar fevral oyida (8 335 erkak, 7 042 ayol) qayd etilgan.
Yarim yil mobaynida o‘lim holatlarining 58,4 foizi qon aylanish tizimi kasalliklari sabab yuz bergan. Shuningdek, 9,4 foiz o‘limlarga o‘simtalar, 6,6 foiziga nafas olish aʼzolari kasalliklari, 5,3 foiziga baxtsiz hodisa, zaharlanish va jarohatlanishlar sabab bo‘lgan. Qolgan 4,1 foiz odam ovqat hazm qilish aʼzolari kasalliklaridan, 1,1 foizi yuqumli va parazitar kasalliklardan, 15,1 foizi boshqa kasalliklardan vafot etgan.
Yanvar–iyun oylarida o‘limlar sonining eng ko‘p ulushi Samarqand viloyatida qayd etildi — 8 905 ta. O‘z navbatida Farg‘ona viloyatida(8 463 ta), Toshkent shahrida (7 924 ta), Andijon (7 559 ta) va Qashqadaryo (7 415 ta) viloyatlarida vafot etganlar soni boshqa hududlardagidan ko‘p bo‘lgan.
O‘limlar sonining nisbatan kam ulushi Sirdaryo viloyatida kuzatilgan —2 072 ta. Shu bilan birga, Navoiy (2 249 ta), Jizzax (2 962 ta), Xorazm (4 241 ta) hamda Buxoro (4 397 ta) viloyatlarida qolgan hududlarga qaraganda o‘limlar kam qayd etilgan.
Avvalroq 2024-yil 1-iyul holatiga O‘zbekistonning doimiy aholisi soni 37 million 134 ming kishini tashkil etgani xabar qilingandi. Shu bilan birga, joriy yil 1-yarmida tug‘ilgan chaqaloqlar soni 2023-yil mos davridagidan 14 700 nafarga kam bo‘lgan ochiqlangan.
Izoh (0)