Mexiko jamoat xavfsizligi vazirligi Jahon chempionati—2026 ning birinchi kuni yakunlari bo‘yicha rasmiy hisobot e’lon qildi. Unga ko‘ra, mundial startiga bag‘ishlangan ommaviy tadbirlarda jami 500 mingga yaqin kishi (mahalliy aholi va sayyohlar) ishtirok etgan.
Qayd etilishicha, JCH—2026 ning ochilish marosimi va dastlabki o‘yiniga mezbonlik qilgan “Atsteka” stadioniga 80 ming kishi bevosita tashrif buyurgan. Shaharning markaziy maydoni — Sokalodagi rasmiy fan-zonada esa 100 ming atrofida ishqiboz jam bo‘lgan. Mustaqillik farishtasi monumenti yonida tashkil etilgan yana bir fan-zona hududida 120 ming kishi yig‘ilgani ma’lum qilingan.
Shuningdek, Mexiko shahri bo‘ylab o‘tkazilgan turli futbol festivallarida yana 200 ming atrofida tomoshabin qatnashgan.
AQSH, Kanada va Meksikada o‘tayotgan Jahon chempionati 19-iyul kuni yakunlanadi. Turnir tarixida ilk bor 48 ta terma jamoa ishtirok etmoqda. Jamoalar 12 guruhga bo‘lingan bo‘lib, har bir guruhdan eng yaxshi ikki jamoa hamda uchinchi o‘rinni egallagan sakkizta eng yaxshi terma jamoalar 1/16 final bosqichiga yo‘l oladi.
