Fransiyaning “Strasburg” klubiga tegishli bo‘lgan va hozirda ijara asosida Saudiya Arabistonining “Neom” jamoasida to‘p surayotgan Rayan Messi Yevropa grandlari e’tiboriga tushdi. 18 yoshli vingerning xizmatlariga “Barselona”, “Bavariya” va “PSJ” kabi klublar jiddiy qiziqish bildirmoqda.
Biroq bu transferga “Chelsi” to‘sqinlik qilishi mumkin. Gap shundaki, “Strasburg” va “Chelsi” klublari bitta xo‘jayinga tegishli. Shu sababli, London klubi iqtidorli futbolchini o‘z loyihasining muhim qismi deb hisoblamoqda va uni boshqa jamoaga o‘tmasligi uchun transfer jarayonini tezlashtirishni rejalashtirgan.
Ma’lumot uchun, joriy mavsum Rayan Messi barcha turnirlar doirasida jami 22 ta o‘yinda maydonga tushib, o‘z hisobiga 3 ta gol va bitta golli uzatma yozdirib qo‘ygan. U 2026-yilning yoziga qadar “Neom” safida to‘p tepadi. Shundan keyin Fransiyaga qaytishi kutilmoqda. Uning “Strasburg” bilan amaldagi shartnomasi 2030-yilning yoziga qadar mo‘ljallangan. Transfermarkt portali vingerning qiymatini 1 million yevroga baholamoqda.
