Fransiyaning “PSJ” klubi XXI asrda bir kalendar yil ichida olti sovrinni qo‘lga kiritgan uchinchi jamoa bo‘ldi. Bu haqda Squawka nashri xabar berdi.
Parijliklar 2025-yil davomida Fransiya Superkubogi–2024, Fransiya chempionati, Fransiya kubogi, Chempionlar Ligasi, Yevropa Superkubogi hamda Qit’alararo kubokni qo‘lga kiritdi. Bungacha XXI asrda bunday natijaga faqat ikki jamoa erishgan edi.
2009-yilda “Barselona” La Liga, Ispaniya kubogi, Ispaniya Superkubogi, Chempionlar Ligasi, Yevropa Superkubogi va klublar o‘rtasidagi Jahon chempionatida g‘olib chiqqan.
2020-yilda esa “Bavariya” Bundesliga, Germaniya kubogi, Germaniya Superkubogi, Chempionlar Ligasi, Yevropa Superkubogi hamda klublar o‘rtasidagi Jahon chempionatini yutib, ushbu natijani takrorlagan.
Ma’lumot uchun, 17-dekabr, chorshanba kuni “PSJ” Qit’alararo kubok finalida Braziliyaning “Flamengo” jamoasi bilan bahs olib bordi. Asosiy vaqt 1:1 hisobida yakunlandi, penaltilar seriyasida esa parijliklar 2:1 hisobida g‘alaba qozondi.
