“Anorbank”ning yagona aksiyadori, o‘zbekistonlik 48 yoshli Qahramonjon Olimov Parijda o‘g‘irlab ketildi, deb yozmoqda Fransiyaning Le Monde nashri.
Ma’lum qilinishicha, u 23-iyun kuni mamlakat poytaxtining hashamatli hududida o‘g‘irlangan, uch nafar erkak unga tashlanib, qo‘l-oyog‘idan tutib, bo‘ynidan bo‘g‘ib Mercedes furgonida Nissa yaqinidagi villaning yerto‘lasiga olib ketgan. U yerda kaltaklangan, o‘ldirish bilan tahdid qilingan.
Qahramonjon Olimov uni o‘g‘irlaganlardan birini tanigan — sobiq biznes-hamkori bo‘lgan. U Olimovni bankdagi ulushini tortib olishda ayblab, undan 10 million dollar talab qilgan.
Xabarda aytilishicha, Olimovda ko‘plab ko‘karishlar va jarohatlar qayd etilgan. Tovon pulining bir qismini to‘langanidan keyin qo‘yib yuborishgan. Shundan so‘ng Nissadagi vokzalga kelib, Parijga poyezdda yetib borgan va politsiyaga xabar bergan.
1-iyul kuni Fransiya politsiyasi Turkiya fuqarosi bo‘lgan gumonlanuvchilardan birini qo‘lga olgan. Qahramonjon Olimovning o‘zi Toshkentga qaytib kelgan.
Qahramon Olimov – “Anorbank”ning asosiy aksiyadori hisoblanadi. U bank aksiyalarining 99,38 foiziga egalik qiladi.
Izoh (0)