Kaliforniyada yuz bergan o‘rmon yong‘inlarida halok bo‘lganlar soni 24 nafarga yetdi. Bu haqda Los-Anjeles okrugi sud-tibbiy ekspertiza byurosi xabar berdi.
Ma’lum qilinishicha, okrugning shimoli-sharqiy qismidagi Itonda 16 kishi, shaharning g‘arbiy qismidagi Palisayd okrugida esa 8 kishi halok bo‘lgan. Yong‘inlar shamol kuchayishi va ob-havo sharoiti murakkablashishi tufayli davom etishi kutilmoqda.
Kaliforniyada o‘rmon yong‘inlari 7-yanvardan buyon davom etmoqda. Falokat Los-Anjeles hududlarini, jumladan, Pasifik-Paliseyds, Altadena va Malibu shaharlarini qamrab oldi. Keyinchalik yong‘in Iton, Xerst va boshqa hududlarga ham tarqaldi.
Yong‘inlar jami 40 ming akrdan ortiq (16 ming gektardan ortiq) maydonni qamrab olgan. CBS ma’lumotlariga ko‘ra, o‘rmon yong‘inlari tufayli 100 mingdan ortiq odam evakuatsiya qilingan. Kaliforniya gubernatori Gevin Nyusom bu yong‘inlar zarar ko‘lami bo‘yicha AQSH tarixidagi eng yomon tabiiy ofat bo‘lishini aytdi.
JPMorgan banki tahlilchilarining dastlabki hisob-kitoblariga tayanib, sug‘urta kompaniyalarining yong‘in tufayli yo‘qotishlari 20 milliard dollarga, umumiy zarar esa 50 milliard dollarga yetishi mumkin. Amerika politsiyasi Los-Anjelesda yirik yong‘in uyushtirganlikda gumonlanayotgan shaxsni qo‘lga olgan. Gumonlanuvchiga qotillik bilan teng keladigan jazo va umrbod qamoq jazosi tayinlanishi mumkin.
