Toshkentning Yangihayot tumanida ikki yuk mashinasi ishtirokida sodir bo‘lgan YTHda haydovchilardan biri halok bo‘ldi. BU haqda poytaxt YHXB matbuot xizmati xabar berdi.
26-noyabr kuni soat 20:30 larda Yangihayot tumani 4R21 ko‘chasi Qozog‘iston gilamlari do‘koni qarshisidagi qayrilib olish joyida haydovchi Q.A. (1982-yilda tug‘ilgan) boshqaruvidagi BKA yuk transport vositasiga I.Q. (1987-yilda tug‘ilgan) boshqaruvidagi Isuzu rusumli transport vositasi kelib urilgan.
Oqibatda Isuzu haydovchisi voqea joyida vafot etgan.
Holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) 2-qismi bilan jinoyat ishi qo‘zg‘atilib dastlabki tergov harakatlari olib borilmoqda.
Toshkentda noyabrda sodir bo‘lgan YTHlar
3-noyabr tunda poytaxtning uchta tumanida YTHlar sodir bo‘ldi. Sergelida Spark va Matiz to‘qnashdi, Yunusobodda Lacetti yo‘l chetidagi beton ustunga borib urildi, Mirzo Ulug‘bek tumanida Lacetti va BMW to‘qnashdi. 11-noyabr kuni Mirobod tumanidagi “Sanʼat muzeyi” qarshisida Lacetti King Long avtobusi orqasiga borib urilib, jarohatlandi. 16-noyabrda Yakkasaroy tumani Malibu yo‘l chetidagi temir ustunga urildi va haydovchisi va yo‘lovchisi jarohat oldi. 17-noyabr kuni Yunusobod tumanida Toyota, Malibu 2 va Cobalt avtomashinalari ishtirokida YTH sodir bo‘ldi. 24-noyabr kuni Mirzo Ulug‘bek tumanida Spark va Epica to‘qnashib, yonib ketdi. Hodisa oqibatida hech kim halok bo‘lmagan.
