Andijon viloyatining Shahrixon tumanida yashovchi haydovchi o‘zining Cobalt’ida 43 ta qoidabuzarlik sodir etgani aniqlandi. Bu haqda MIB Andijon viloyat boshqarmasi axborot xizmati “Daryo”ga xabar berdi.
Ma’lum qilinishicha, Shahrixon tumanida yashovchi D.I. boshqaruvidagi Cobalt avtomashinasida o‘tgan 5 oy davomida 43 marotaba tezlikni oshirib qoidabuzarlik sodir etgan va bu uchun jami 20,1 million so‘m ma’muriy jarimaga tortilgan.
Ijro harakati davomida ushbu shaxsdan sodir etgan qoidabuzarliklari uchun 20,1 mln so‘m jarima hamda o‘z muddatida to‘lamagani uchun 2,1 mln so‘m qo‘shimcha jarima pullari undirildi.
Avvalroq Toshkentda Spark haydovchisining 54 ta jarimasi borligi, yana bir haydovchining esa ijaradagi Matiz’ida 118 ta qoidabuzarlik sodir etgani aniqlangandi.
Qamchiq dovonida jarimalardan 100 mln so‘m qarzi bor Nexia-2 ushlangani haqida xabar berilgandi.
