Termiz iqtisodiyot va servis institutida “Yangilanayotgan Konstitutsiya –xalqimizning farovon hayoti uchun mustahkam huquqiy asos bo‘ladi” mavzusida tadbir o‘tkazildi. Oliy Majlis Qonunchilik palatasi Spikeri o‘rinbosari, O‘zLiDeP fraksiyasi rahbari Aktam Xaitov Bosh qomusimizga kiritilayotgan o‘zgartirishlar haqida o‘qituvchi va talabalarga ma’lumot berdi.
Konstitutsiyamizdagi moddalar 128 tadan 155 taga, normalari esa 275 tadan 434 taga ko‘paymoqda. O‘zgartish va qo‘shimchalarda inson erki, qadr-qimmati asos qilib olindi. Jumladan, aybsizlik prezumpsiyasi, uy-joy daxlsizligi, qonunda cheklanmagan har qanday faoliyat turi bilan shug‘ullanish erkinligi, ishsizlikdan himoyalanish kabi normalar kirtildi.
Ijtimoiy davlatga xos yondashuv ta’lim sohasi bo‘yicha ham ko‘pgina modda va normalarda o‘z ifodasini topmoqda. Ta’lim va ilm-fanga oid normalar qariyb 2 barobarga ko‘paygan. O‘zbekistonning ta’lim va intellektual rivojlanish darajasi bo‘yicha dunyoda eng yuqori reytingga ega 30 ta davlat qatoridan joy olishini ta’minlashni ustuvor maqsadlaridan biri deb biladigan O‘zLiDeP mazkur o‘zgarishlar Bosh qonunimizda darj qilinishidan g‘oyat manfaatdor.
Ta’lim olish huquqi va imkoniyati ham kengaytirilib, o‘qituvchilar konstitusiyaviy maqomga ega bo‘lishi belgilanyapti. Oliy ta’lim tashkilotlariga akademik erkinlik berilishi, tanlov asosida davlat hisobidan bepul oliy ma’lumot olinishi, nodavlat ta’lim tashkilotlari qo‘llab-quvvatlanishi to‘g‘risidagi qoidalar yosh avlodning hayotini yaxshilash, orzu-intilishlarini ro‘yobga chiqarish, zamonaviy mutaxassisliklarni egallab jamiyatda munosib o‘rin topishiga shart-sharoit yaratadi.
Oxirgi olti yilda institut va universitetlar 77 tadan 210 taga, ularga qabul esa 5 baravarga ortib, talabalar soni 1 millionga, oliy ta’lim qamrovi 9 foizdan 38 foizga oshdi. Davlat grantlari ham 2 baravar ko‘payib, 40 mingtaga yetdi, shundan magistratura uchun 5 baravar o‘sdi. Bu ham bugungi yoshlarimiz uchun yaratilayotgan imkoniyatlar natijasi ekanligi ta’kidlandi.
Oliy Majlis Qonunchilik palatasi Spikeri o‘rinbosari, O‘zLiDeP fraksiyasi rahbari Aktam Xaitov shu yil 30 aprel kuni bo‘lib o‘tadigan umumxalq referendumida barcha ustozlar va talabalarni o‘z fuqarolik pozisiyasini namoyon etgan holda faol ishtirok etishga chaqirdi.
O‘zLiDeP Surxondaryo viloyati kengashi matbuot xizmati
Izoh (0)