Erdo‘g‘on Shvetsiyada Qur’onning yoqib yuborilishiga munosabat bildirdi

Turkiya prezidenti Rajab Toyyib Erdo‘g‘on Stokgolmda Qur’on yoqib yuborilganiga munosabat bildirib, Shvetsiya endi NATOga a’zolikda qo‘llab-quvvatlanmasligini aytdi. Bu haqda Anadolu xabar berdi.

Erdo‘g‘on Turkiya Vazirlar Mahkamasi yig‘ilishi yakunlari bo‘yicha telemurojaatida bu haqda gapirdi.

“Turkiyaning Stokgolmdagi elchixonasi oldida bunday sharmandalikka yo‘l qo‘yganlar NATOga a’zo bo‘lish haqidagi arizalarida bizdan hech qanday iltifot kutmasligi kerak. Shvetsiya Turkiyani, shuningdek, musulmonlarning diniy tuyg‘ularini hurmat qilmasa, NATOga a’zo bo‘lish borasida bizdan hech qanday yordam olmaydi”, — dedi Turkiya rahbari.

“Shvetsiyada sodir etilgan jirkanch harakat musulmonlarning huquq va erkinliklarini hurmat qiladigan har bir shaxsga nisbatan haqoratdir. “Agar Shvetsiya terrorchi tashkilot a’zolari va Islom dushmanlarini shu qadar qo‘llab-quvvatlayotgan bo‘lsa, biz unga o‘z mamlakati mudofaasini ularga ishonib topshirishni maslahat beramiz”, — dedi Turkiya davlat rahbari.

21-yanvar, shanba kuni Shvetsiyaning ultrao‘ngchi “Qattiq kelishuv” partiyasi yetakchisi Rasmus Paluda Turkiyaning Stokgolmdagi elchixonasi yonida Qur’onni omma oldida yoqib yubordi.

Shvetsiya rasmiylarining harakatlariga javoban Anqara Shvetsiya mudofaa vaziri Pal Jonsonning Turkiyaga kutilayotgan tashrifini bekor qildi.

Shvetsiyaning Anqaradagi elchisi Staffan Xyorrstrem Turkiya Tashqi ishlar vazirligiga chaqirilib, Shvetsiya rasmiylari tomonidan Stokgolmdagi Turkiya elchixonasi oldida Qur’onni yoqish uchun aksiya o‘tkazishga ruxsat berilgani munosabati bilan unga keskin norozilik bildirildi. Shvetsiya hukumati tomonidan Qur’onni tahqirlash aktini amalga oshirishga ruxsat berilgani ko‘plab islom davlatlarining keskin salbiy munosabatiga sabab bo‘ldi.