Bugun,

  • USD 11095.31
  • RUB 173.84
  • EUR 10772.44

G‘oyib bo‘lgan chechenistonlik bloger Tumso Abdurahmonov tirik, u Myunxenda ukasiga suiqasd uyushtirilishi haqidagi ish bo‘yicha ko‘rsatmalar berishga tayyorlanmoqda. Bu haqda Shvetsiya radiosi sud vakili Loran Laflerga tayanib xabar berdi.

Tumso Abdurahmonov

Tumso Abdurahmonov
Foto: EPA

Avvalroq OAVlarda o‘ldirib ketilgani haqida xabarlar tarqalgan chechenistonlik bloger sog‘-omonligi haqida sobiq chechen dala qo‘mondoni Ahmed Zakayev ham ma’lum qilgan.

Abdurahmonov Shvetsiya politsiyasi himoyasi ostida bo‘lib turibdi, deya o‘z-o‘zini respublika deb e’lon qilgan Checheniston Ichkeriya Respublikasi hukumati matbuot xizmati vakili Zakayev “Kavkaz.Realii” nashriga ma’lum qildi. Matbuot xizmati vakili “o‘z manbalari”ga tayangan. U Abdurahmonov himoya ostida bo‘lib turishi sababiga aniqlik kiritmadi.

Tumso Abdurahmonov o‘ldirib ketilgani haqidagi ilk xabarlar 1-dekabrdayoq paydo bo‘lgan edi. Huquq himoyachilari aytishicha, u va ukasi aloqaga chiqmay qo‘ygan. Bir necha kundan keyin esa Chechenistonning 1ADAT muxolifatchi Telegram-kanali hamda “Radio Svoboda” (uning safdoshlariga tayanib) uning o‘ldirib ketilgani haqida xabar berdi. Abdurahmonov so‘nggi yillarda yashab kelgan Shvetsiya politsiyasi uning o‘limini tasdiqlamagan.

8-dekabr kuni esa “Kavkazskiy uzel” Tumso Abdurahmonovning o‘ldirilganini uning qarindoshlari ham, Shvetsiya politsiyasi ham, Checheniston hukumati ham tasdiqlamagani haqida yozgan.

Checheniston Ichkeriya Respublikasi — Checheniston hududida 1993—1999-yillarda mavjud bo‘lgan, o‘z-o‘zini respublika deb e’lon qilgan, Rossiyadan mustaqil bo‘lgan respublika. Ikkinchi chechen urushi chog‘ida yo‘q qilingan, uning yakunida Chechenistonga uning hozirgi yetakchisi Ramzan Qodirovning otasi Ahmad Qodirov rahbar bo‘lgan.

Tumso Abdurahmonov Checheniston hukumatiga nisbatan tanqidlari bilan mashhur bo‘lgan. 2015-yilda u Checheniston rahbari Ramzan Qodirovning qarindoshlari bilan nizo yuzaga kelganidan keyin Rossiyani tark etgandi. Shvetsiyada u siyosiy qochqin maqomini qo‘lga kiritgan. Chechenistonda Abdurahmonov ISHID bilan aloqalarda ayblanmoqda. 2020 va 2021-yillarda Abdurahmonov va uning ukasi Muhammadga suiqasdlar uyushtirilgandi. 2021-yil dekabrida Tumso Abdurahmonov Chechenistonda uning to‘qqiz nafar qarindoshi qo‘lga olinganini ma’lum qilgandi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.

Izoh
Asosiy yangiliklar
Dunyo
Turkiya va Suriyadagi zilzila nega halokatli oqibatlarga olib keldi?
Mahalliy
“Qardoshlarimizga hamdardmiz”. O‘zbek jamoatchiligi Turkiyadagi zilzilaga munosabat bildirdi
Dunyo
Turkiya va Suriyadagi kuchli zilzila: Vayronalar ostidan odamlar qidirilmoqda — fotoreportaj