Xorazmda sug‘oriladigan yerda sun’iy baliq ko‘li tashkil qilinib, davlatga 15,4 mlrd so‘m zarar yetkazildi

Xorazmda sug‘oriladigan yerda noqonuniy ravishda sun’iy baliq ko‘li tashkil qilinib, davlatga 15,4 mlrd so‘m zarar yetkazildi. Bu haqda Bosh prokuratura matbuot xizmati xabar berdi.

Ma’lum qilinishicha, Xorazm viloyati prokuraturasi tomonidan olib borilgan tekshirishda fuqaro Sh.G. Yangiariq tumani “Qo‘riqtom” mahallasi hududidagi “B.T.I.” fermer xo‘jaligiga ajratilgan 34 ball bonitetli jami 40,7 gektar sug‘oriladigan yer maydonining 37,9 gektar qismida noqonuniy ravishda sun’iy baliq ko‘li tashkil qilgani aniqlangan.

Buning oqibatida tuproqning unumdorlik qatlamini buzib, davlat manfaatlariga 15,4 mlrd so‘m miqdorida zarar yetkazilgan.

Mazkur holat yuzasidan “B.T.I.” fermer xo‘jaligi rahbari G.Sh.ga nisbatan Jinoyat kodeksining 197-moddasi va boshqa tegishli moddalar bilan jinoyat ishi qo‘zg‘atilib, tergov harakatlari olib borishga kirishilgan.

Mavzuga doir: Sirdaryoda 3 gektar sug‘oriladigan yerda baliqchilik ko‘li tashkil etib, 1,3 mlrd so‘m zarar yetkazgan fermer ushlandi