O‘zbekistonda aholi muammolari bilan ishlash sohasida yangi tizimga o‘tilmoqda
O‘zbekiston prezidenti topshirig‘iga muvofiq aholi muammolari bilan ishlash sohasida yangi tizim joriy etilmoqda. Prezident xalq qabulxonasining “Daryo”ga ma’lum qilishicha, tajriba sifatida Toshkent viloyatining og‘ir hududlaridan biri bo‘lgan Oqqo‘rg‘on tumani tanlab olindi.
Unga ko‘ra, prezident maslahatchisi G‘ofurjon Mirzayev boshchiligidagi 24 ta vazirlik va idora rahbarlaridan iborat ishchi guruhi 4 ta sektor kesimida tumandagi 29 ta mahallada faoliyat olib bormoqda.
Ishchi guruhi tuman hududini mahallama-mahalla, uyma-uy yurib, har bir xonadonning sharoiti bilan tanishib, aholi muammolari va ijtimoiy-iqtisodiy masalalarini o‘rganib, ularni tezkor va samarali hal qilish choralarini ko‘rmoqda. Ushbu jarayonda asosiy e’tibor og‘ir ijtimoiy ahvoldagi, yakka-yolg‘iz, boquvchisini yo‘qotgan insonlarni qiynayotgan masalalarga yechim topishga qaratilmoqda.
Mas’ullar, ishchi guruhi a’zolari bevosita chekka hududlardagi qishloqlarda tunab, o‘sha yerda mahalla faollari, oqsoqollar, keksa nuroniylar, faollari bilan aholida mavjud muammolar xususida muhokamalar o‘tkazib, joyida yechim izlamoqda.
Ayni paytda Oqqo‘rg‘on tumanining “Yoshlik”, “Madaniyat”, “Jag‘alboyli”, “Suvti”, “Qo‘shtamg‘ali”, “Mustaqillik”, “Xonobod”, “Eltamg‘ali”, “Sulton Segizboyev”, “Tolovul” mahallalaridagi 920 ta xonadon va 15 ta ijtimoiy soha obyekti o‘rganildi. Ularda aniqlangan 547 ta masalaning 76 tasi (13,8 foizi) hal qilindi, 471 ta masala bo‘yicha chora-tadbirlar belgilandi.
Xususan, “Mustaqillik” mahallasida yashovchi 70 yoshli og‘ir ijtimoiy ahvoldagi Vladimir Vyatchinin davolanishi uchun Toshkent viloyati ixtisoslashtirilgan somatika shifoxonasiga yotqizilgan bo‘lsa, “Madaniyat” mahallasidagi A. Mamazoitov xonadoniga 40 metr quvur tortilib, tabiiy gaz ta’minotiga ulab berildi. Hududda tashkil qilingan chuqurlashtirilgan tibbiy ko‘rik natijasida ambulator sharoitdagi 36 nafar bemor kerakli dori-darmonlar bilan ta’minlandi.
“Mustaqillik” mahallasidagi eskirgan simyog‘ochlar beton ustunlarga almashtirilayotgan bo‘lsa, “Yoshlik” mahallasi Zamahshariy ko‘chasidagi suv quvurlari ta’mirlanmoqda.
Shu bilan birga, muddat va mablag‘ talab qiladigan qator masalalarni kelgusi yil dasturlariga kiritish belgilandi. Xususan, “Suvti” mahallasidagi yaroqsiz ko‘prik ta’mirlanishi bilan kamida 400 nafar aholini o‘ylantirayotgan tizimli masala hal qilinadi. Yoki “Xonobod” mahallasidagi 1960-yilda qurilgan 450 o‘rinli 9-sonli maktabga qo‘shimcha bino qurilishi rejalashtirildi.
Xuddi shunday “Madaniyat” mahallasidagi 22-, 27-, 47-, 50-sonli maktablarni, ayniqsa, 50-maktabning achinarli ahvoldagi sport zalini rekonstruksiya qilish, mahallalarning qishda loy, yozda chang ko‘chalarini ta’mirlash, “Qo‘shtamg‘ali”dagi 500 ta yaroqsiz simyog‘ochlarni beton ustunlarga almashtirish bilan minglab insonlar hayotida amaliy o‘zgarishlarga erishiladi.
Respublika ishchi guruhi o‘z faoliyatini davom ettirmoqda.
Eslatib o‘tamiz, prezident farmoniga muvofiq 2019-yil 1-fevraldan boshlab Xalq qabulxonalarining aholi murojaatlari bilan ishlash bo‘yicha amaldagi tizimi bilan bir qatorda, Xalq qabulxonalarining muammolarni uyma-uy yurish orqali aniqlash va hal qilishini, davlat organlarining aholi bilan bevosita ishlashini nazarda tutuvchi yangi tizim joriy qilinmoqda.
Mazkur yangi tizim joriy etilishining asosiy sababi murojaatlar bilan ishlashning amaldagi tizimi aholining mavjud muammolarini to‘liq qamrab olish va tezkorlik bilan hal qilish imkonini bermayotgani bilan bog‘liq. Chunki barcha davlat organlari kabi Xalq qabulxonalari ham o‘z faoliyatida jismoniy va yuridik shaxslarning murojaatlarini qabul qilish va ko‘rib chiqish amaliyotidan foydalanib kelmoqda. Bu esa faqat murojaat tufayli yuzaga qalqib chiqqan muammolarnigina ro‘yxatga olish hamda u yoki bu tarzda munosabat bildirish imkonini beradi, xolos.
