Joriy yilning oktabr oyida o‘tkazilgan so‘rov natijalariga ko‘ra, respondentlar tomonidan sezilgan inflyatsiya darajasi biroz pasayib 14,6 foizni tashkil etdi. Bu haqda Markaziy bank xabar bermoqda.
Belgilangan javoblarning o‘rtacha qiymati 0,3 foiz bandga oshdi va 11,9 foiz atrofida shakllandi.
So‘rov ishtirokchilari orasida inflyatsiyani 13-20 foiz darajada his qilganlar ulushi o‘tgan oyga nisbatan 7 foiz bandga ko‘paydi.
Aksincha, inflyatsiyani 20 foizdan yuqori oshganini his qilganlar ulushi sentabr oyidagi 24 foizdan oktabr oyida 20 foizgacha kamaydi.
Oktabrda respondentlar tomonidan asosiy iste’mol tovarlaridan narxlari yuqori oshganligini belgilaganlar ulushi o‘tgan oyga nisbatan qisqargan.
Xususan, go‘sht, sut, yog‘, tuxum, kiyim, poyabzal hamda ijara haqi narxlari yuqori darajada oshgan deb qayd etganlar ulushi deyarli o‘zgarmagan. Non, un, shakar, benzin narxlari oshganligini belgilagan respondentlar ulushi o‘tgan oyga nisbatan kamayganini ko‘rish mumkin.
Shuningdek, ishlab chiqarish, tibbiyot, maishiy xizmat, ilm-fan va ta’lim hamda davlat tashkilotlarida faoliyat yuritayotgan respondentlar inflyatsiyani yuqoriroq sezgan.
Hududlar kesimida Toshkent, Xorazm, Samarqand viloyatlari hamda Toshkent shahrida respondentlar tomonidan sezilgan inflyatsiya darajasi nisbatan yuqoriroq darajada shakllangan. Surxondaryo, Navoiy, Andijon viloyatlari hamda Qoraqalpog‘iston Respublikasida esa nisbatan pastroq ko‘rsatkichlar qayd etildi.
Avvalroq global inflyatsiya o‘zining eng yuqori darajasiga yetgani haqida xabar berilgandi.
Izoh (0)