Davlat soliq qo‘mitasi MXIKlar sonini bir necha barobarga qisqartirdi
O‘zbekistonda umumiy ovqatlanish shoxobchalari uchun mahsulotlar va xizmatlar identifikatsiya kodlarining (MXIK) takomillashtirilgan ro‘yxati shakllantirildi. Bu haqda Davlat soliq qo‘mitasi xabar bermoqda.
Ushbu ro‘yxat katalogga 2022-yil 28-noyabrda joylashtirildi va undan foydalanish mumkin bo‘ladi.
Endilikda umumiy ovqatlanish shoxobchalari uchun barcha kodlar alohida sinflarga ajratilgan va 3 asosiy guruhga bo‘lingan:
- “Umumiy ovqatlanish taomnomasi” — 10202001;
- “Umumiy ovqatlanish shoxobchalaridagi boshqa xizmatlar” — 10202002;
- “Oziqlantirishni tashkil etish (keytering), umumiy ovqatlanish shoxobchalari va banket zallarida boshqa tadbirlarni tashkil etish xizmatlari — 10202003.
Bunda, umumiy ovqatlanish shoxobchalarida foydalanish uchun tavsiya etilgan kodlar soni 306 tadan 47 tagacha (bularning 26 tasi taomlar) qisqartirildi.
Yangi strukturada taomlar bilan bir qatorda umumiy ovqatlanish shoxobchalarida ko‘rsatiladigan qo‘shimcha xizmatlar alohida toifalarga ajratilgan (masalan, yetkazib berish xizmati, bir martalik idishlar, bolalar o‘yin maydonchasi, xizmat ko‘rsatish, xonalarni bezatish va boshqalar).
Shuningdek, tasniflashning qabul qilingan usullariga binoan taomlar quyidagi toifalarga ajratildi:
- gazak;
- fast-fud;
- salatlar;
- sho‘rvalar;
- non va non mahsulotlari;
- asosiy taomlar;
- garnirlar, souslar va boshqa qo‘shimchalar;
- desertlar;
- kompleks ovqatlanish ratsionlari;
- qahva, choy va boshqa alkogolsiz ichimliklar (raqamli markirovkalanmaydigan ichimliklar).
2022-yilning 9-dekabriga qadar amaldagi kodlar ro‘yxatidan foydalanish mumkin. Shu bois hozirda nazorat-kassa texnikalarida amal qilayotgan kodlarni taklif qilinayotgan kodlarga belgilangan sanagacha o‘zgartirish tavsiya etiladi.
