Ўзбекистонда умумий овқатланиш шохобчалари учун маҳсулотлар ва хизматлар идентификация кодларининг (МХИК) такомиллаштирилган рўйхати шакллантирилди. Бу ҳақда Давлат солиқ қўмитаси хабар бермоқда.
Ушбу рўйхат каталогга 2022 йил 28 ноябрда жойлаштирилди ва ундан фойдаланиш мумкин бўлади.
Эндиликда умумий овқатланиш шохобчалари учун барча кодлар алоҳида синфларга ажратилган ва 3 асосий гуруҳга бўлинган:
- «Умумий овқатланиш таомномаси» — 10202001;
- «Умумий овқатланиш шохобчаларидаги бошқа хизматлар» — 10202002;
- «Озиқлантиришни ташкил этиш (кейтеринг), умумий овқатланиш шохобчалари ва банкет залларида бошқа тадбирларни ташкил этиш хизматлари — 10202003.
Бунда, умумий овқатланиш шохобчаларида фойдаланиш учун тавсия этилган кодлар сони 306 тадан 47 тагача (буларнинг 26 таси таомлар) қисқартирилди.
Янги структурада таомлар билан бир қаторда умумий овқатланиш шохобчаларида кўрсатиладиган қўшимча хизматлар алоҳида тоифаларга ажратилган (масалан, етказиб бериш хизмати, бир марталик идишлар, болалар ўйин майдончаси, хизмат кўрсатиш, хоналарни безатиш ва бошқалар).
Шунингдек, таснифлашнинг қабул қилинган усулларига биноан таомлар қуйидаги тоифаларга ажратилди:
- газак;
- фаст-фуд;
- салатлар;
- шўрвалар;
- нон ва нон маҳсулотлари;
- асосий таомлар;
- гарнирлар, соуслар ва бошқа қўшимчалар;
- десертлар;
- комплекс овқатланиш рационлари;
- қаҳва, чой ва бошқа алкоголсиз ичимликлар (рақамли маркировкаланмайдиган ичимликлар).
2022 йилнинг 9 декабрига қадар амалдаги кодлар рўйхатидан фойдаланиш мумкин. Шу боис ҳозирда назорат-касса техникаларида амал қилаётган кодларни таклиф қилинаётган кодларга белгиланган санагача ўзгартириш тавсия этилади.
Изоҳ (0)