Farg‘ona va Namangan aeroportlarini quyuq tuman qopladi, reyslar kechikadigan bo‘ldi
Farg‘ona vodiysidagi aeroportlar faoliyatini 26-noyabr kuni kechga yaqin quyuq tuman cheklab qo‘ydi. Farg‘ona va Namanganga qo‘nishi lozim bo‘lgan reyslar Toshkentdagi muqobil aerodromga yo‘naltirildi.
Xususan, ob-havo sharoiti tufayli ko‘rish masofasi 50 metrdan kam – “Aeroflot” aviakompaniyasining SU-1970 reysi Farg‘ona aeroportiga qo‘na olmay, Toshkent xalqaro aeroportiga yo‘naltirildi. Samolyot poytaxtga mahalliy vaqt bilan 18:33 da qo‘ndi. Poytaxtdan Farg‘onaga uchish Toshkent vaqti bilan soat 07:00 da, Farg‘onadan Moskvaga (Sheremetevo) soat 08:50 da rejalashtirilgan.
Uzbekistan Airways aviakompaniyasining Istanbuldan uchgan HY278 reysi mahalliy vaqt bilan soat 20:47 da Toshkentga qo‘ndi. Ko‘rinishning yomonligi (200 metr) tufayli Namangan aeroporti ham Yamal aviakompaniyasining Moskvadan uchgan LLM9113 reysini qabul qila olmadi. Samolyot Toshkentga soat 17:46 da qo‘ndi.
Dastlabki ma’lumotlarga ko‘ra, tuman ertasi kuni ertalabgacha tarqalishi kutilmoqda. Yana bir nechta reyslar, xususan, J91645/1646 Quvayt—Namangan—Quvayt (taxminiy yetib kelish vaqti — 22:10), FZ 781/782 Dubay—Namangan—Dubay (kelish — 01:20) va LLM 9123/9114 Sankt-Peterburg—Namangan—Moskva (kelish soat 05:30), HY82 Toshkent—Farg‘ona (kelish 21:50) va HH12 Toshkent—Farg‘ona (kelish soat 06:20) reyslari ham ob-havo sharoiti tufayli kechiktiriladi.
Mavzuga doir:
- Farg‘ona—Toshkent aviareysi qoldirildi
- Parijdan Toshkentga uchgan samolyot noqulay ob-havo sabab Samarqandga yo‘naltirildi
- Toshkentdan Moskva, Istanbul, Dubay va boshqa shaharlarga rejalashtirilgan reyslar kechiktirildi
