Qoraqalpog‘istonda bo‘lib o‘tgan tartibsizliklar bo‘yicha sud jarayonlari 28-noyabr kuni boshlanadi. Bu haqda hududda sodir bo‘lgan voqealar yuzasidan mustaqil tekshiruv o‘tkazish bo‘yicha komissiya xabar bermoqda.
16-iyul kunidan Qoraqalpog‘istonda yuz bergan holat va voqealarni o‘rganish hamda ular yuzasidan mustaqil tekshiruv o‘tkazish bo‘yicha komissiya o‘z ishini boshlagan edi. Komissiya inson huquq va erkinliklarini ta’minlash, voqealarni har tomonlama va xolis o‘rganish, shuningdek, olingan axborotlarni qayta tekshirish hamda o‘z faoliyatini jamoatchilik fikrini inobatga olgan holda tashkil qilishni asosiy vazifasi sifatida belgilagan.
Dastlab aholi fikrini o‘rganish maqsadida fuqarolarga 1374 qisqa raqamli Call-markazi va to‘g‘ridan to‘g‘ri komissiya shtabiga kelib murojaat qilish imkoniyati yaratilgan bo‘lsa, keyinchalik @independetuz_bot telegram kanali ishga tushirilib, murojaatlar elektron tarzda ham qabul qilindi.
Fuqarolar murojaatlari bilan ishlash bilan birga Qoraqalpog‘istonda yuz bergan holat va voqealar joyiga chiqib o‘rganilib, tegishli ma’lumotlar olindi va ular tahlil qilindi. Xususan, bir qator davlat organlari va idoralariga, ijtimoiy obyektlarga, xususan Qoraqalpog‘iston Jo‘qorg‘i Kengesi, Ko‘p tarmoqli tibbiyot markazi, harbiy va ichki ishlar gospitallari, huquqni muhofaza qiluvchi organlarga, ya’ni Milliy gvardiya, Nukus shahri ichki ishlar bo‘limi, Nukus shahridagi Shimoliy-g‘arbiy harbiy okrug, Nukus xalqaro aeroportiga tashrif buyurildi.
Qolaversa, komissiya fuqarolar tomonidan kelib tushayotgan ko‘plab murojaatlardan kelib chiqqan holda Qoraqalpog‘istonda ro‘y bergan voqealarda asosiy gumonlanayotgan va hozirda tergov jarayonida bo‘lib turganlar bilan yakka tartibda suhbatlar olib bordi. Bunda sodir etgan qilmishiga pushaymon va ijtimoiy sharoiti og‘ir bo‘lgan ayblanuvchilarning ro‘yxatlari shakllantirilib, ularni oilasiga qaytarish bo‘yicha tegishli choralar ko‘rildi.
Shu kunga qadar komissiya a’zolari taklifi va Jo‘qorg‘i Kengesi iltimosnomasiga ko‘ra, Bosh prokuratura tomonidan 107 nafar ayblanuvchi jamoat kafilligi va qamoq ehtiyot chorasi insonparvarlik tamoyili asosida uy qamog‘i tarzidagi ehtiyot chorasiga almashtirilishi orqali o‘z oilasiga qaytarildi.
Tergov jarayonlari davomida ayblanuvchilarning saqlash sharoitlari, qiynoqqa solmaslik, advokat bilan ta’minlanganlik kabi masalalar mustaqil komissiyaning doimiy nazoratida bo‘ldi. Komissiya a’zolari sud jarayonlarida ham kuzatuvchi sifatida ishtirok etadi.
Ma’lumot uchun, iyul oyining dastlabki kunlarida sodir bo‘lgan voqealardan keyin prezident farmoni bilan Qoraqalpog‘istonda 3-iyuldan 2-avgustgacha favqulodda holat joriy etilib, bir qator chora va vaqtinchalik cheklovlar o‘rnatilgandi. Favqulodda holat amal qilishi davrida O‘zbekiston Mudofaa vazirligi kuchlari va vositalari qo‘shimcha ravishda jalb etilishi belgilangan.
3-iyul kuni Shavkat Mirziyoyev yana Nukusga borib, videoselektor o‘tkazgan. Tuman hokimlari va huquqni muhofaza qiluvchi organlar rahbarlari fuqarolarning xavfsizligini ta’minlash, qonuniylik va huquq-tartibotni mustahkamlash bo‘yicha ko‘rilayotgan chora-tadbirlar yuzasidan axborot bergan. Davlat rahbarining murojaatidan keyin vaziyat barqarorlashgani, hayot o‘z maromiga qaytayotgani ma’lum qilingan.
Mavzuga doir:
- Qoraqalpog‘istondagi voqealar yuzasidan ayblanayotganlarning ahvoli haqida ma’lumot olindi
- Komissiya Qoraqalpog‘istondagi voqealar bo‘yicha navbatdagi tekshiruvini boshladi
- Vladimir Norov Qoraqalpog‘istondagi voqealar vaqtida turli xorijiy axborot resurslari feyk ma’lumotlar tarqatgani haqida gapirdi
- Foto: Yoqib yuborilgan harbiy avtobuslar, odatiy hayot tarziga qaytgan Nukus ko‘chalari, qo‘riqlanayotgan Jo‘qorg‘i Kenges binosi — Qoraqalpog‘iston voqealaridan keyingi hayot
Izoh (0)