Kambag‘allikni qisqartirish vazirligi huzuridagi agentlik yangi sayt uchun 8,4 mlrd so‘m sarfladi

Iqtisodiy taraqqiyot va kambag‘allikni qisqartirish vazirligi huzuridagi agentlik 8,4 milliard so‘m sarflab, sayt yaratgani aytilmoqda. Bu haqda Telegram’dagi “Influencer” kanali xabar berdi.

Qiziq tomoni, hech qandan tender o‘tkazilmagan, shuncha pulni to‘g‘ridan to‘g‘ri shartnoma orqali o‘tkazib berishibdi, — deb yozadi Telegram’dagi yana bir kanal muallifi.

Shuningdek, muallif bu borada Korrupsiyaga qarshi kurashish agentligi sustkashlikka yo‘l qo‘yayotganini qo‘shimcha qilgan.

Bu shunchaki axborot beruvchi sayt emas. Bu — katta platforma. Mazkur platformani yaratishda 45 nafar mutaxassis olti oy davomida mehnat qilgan. Ayni kunda ham platformadagi kamchiliklarni bartaraf etish, to‘ldirish ishlari davom etmoqda, — deydi mazkur MCHJ direktori o‘rinbosari Hayotbek Nasrullayev.

Iqtisodiy taraqqiyot va kambag‘allikni qisqartirish vazirligi, agentlik, Axborot texnologiyalari va kommunikatsiyalarini rivojlantirish vazirligi bilan birgalikda bir oy muddatda hokim yordamchilari faoliyatini samarali tashkil etish va baholab borish imkonini beruvchi hamda tegishli vazirlik hamda idoralar ma’lumotlar bazalari bilan integratsiya qilingan “Onlayn mahalla” elektron platformasini ishga tushirish kerakligi haqida topshiriq berilgan, — deydi u.

MCHJ mas’ulining aytishicha, ular bu mehnati uchun ayni paytda aytilayotgan 8,4 milliard so‘mdan ham katta mablag‘ so‘ragan. Ammo vazirlik mas’ullari shuni tasdiqlashgan.

Axborot beruvchi saytlarga ko‘pi bilan 200—300 million so‘m bersangiz, keragidan ortiq to‘lagan bo‘lasiz. Misol uchun, “Mening fikrim” portali esingizdami? Shu platforma yaratilishiga va bir necha yillik texnik yordam uchun 2 milliard so‘m ajratilgan edi. Lekin bu platformaning vazifalari juda ko‘p. Platforma oddiy axborot beruvchi saytlardek emas, — deydi bu mavzu haqida fikr bildirgan mutaxassislardan biri.

Shuningdek, hokim yordamchisi bu platforma orqali mahallani iqtisodiy rivojlantirish, doimiy daromad manbaiga ega bo‘lmagan va ishsiz aholining bandligini ta’minlashga yordam berish, ishsiz aholini bo‘sh ish o‘rinlariga joylashtirish, oilaviy tadbirkorlik uchun imtiyozli kredit olishda ko‘maklashish, kooperatsiya munosabatlarini rivojlantirish, tomorqa yerlaridan samarali foydalanishni tashkil qilish, subsidiyalar olishda ko‘maklashish, mahalladagi bo‘sh bino va yer maydonlarini aniqlab, ulardan samarali foydalanish bo‘yicha takliflar kiritish, aholi va tadbirkorlarning muammolarini aniqlab, ularni hal etish bilan shug‘ullanish kabi amallarni bajaradi.

“Daryo”ning bu haqdagi so‘roviga javob bergan vazirlik axborot xizmati rahbari Dildora Jo‘rayeva ijtimoiy tarmoqlarda muhokama qilinayotgan mazkur masala yuzasidan tez orada batafsil axborot berilishini bildirdi.