Andijonda aholini ichimlik suvi bilan ta’minlash bo‘yicha amalda bajarilmagan ishlar qo‘shib yozilgani aniqlandi

Andijon viloyatining Paxtaobod tumani “Qoraqo‘rg‘on” MFYda aholini ichimlik suvi bilan ta’minlash bo‘yicha amalda bajarilmagan ishlarni qo‘shib yozish orqali ajratilgan mablag‘lar talon-toroj qilingani aniqlandi.

Bosh prokuratura huzuridagi departamentning Paxtaobod tuman bo‘limi tomonidan o‘tkazilgan tergovga qadar tekshiruvda aniqlanishicha, “S.C.” MCHJ rahbari N.A. “Suv ta’minoti va oqava suv obyektlari qurilishi bo‘yicha injiniring kompaniyasi” UK Andijon viloyat hududiy boshqarmasi mas’ul shaxslari bilan o‘zaro til biriktirib, tumandagi “Qoraqo‘rg‘on” MFYda aholini ichimlik suvi bilan ta’minlash bo‘yicha amalda bajarilmagan ishlarni qo‘shib yozgan.

Shu yo‘l bilan ular 249,2 million so‘mni o‘zlashtirish yo‘li bilan talon-toroj qilgan.

Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.