Андижонда аҳолини ичимлик суви билан таъминлаш бўйича амалда бажарилмаган ишлар қўшиб ёзилгани аниқланди

Андижон вилоятининг Пахтаобод тумани «Қорақўрғон» МФЙда аҳолини ичимлик суви билан таъминлаш бўйича амалда бажарилмаган ишларни қўшиб ёзиш орқали ажратилган маблағлар талон-торож қилингани аниқланди.

Бош прокуратура ҳузуридаги департаментнинг Пахтаобод туман бўлими томонидан ўтказилган терговга қадар текширувда аниқланишича, «С.C.» МЧЖ раҳбари Н.А. «Сув таъминоти ва оқава сув объектлари қурилиши бўйича инжиниринг компанияси» УК Андижон вилоят ҳудудий бошқармаси масъул шахслари билан ўзаро тил бириктириб, тумандаги «Қорақўрғон» МФЙда аҳолини ичимлик суви билан таъминлаш бўйича амалда бажарилмаган ишларни қўшиб ёзган.

Шу йўл билан улар 249,2 миллион сўмни ўзлаштириш йўли билан талон-торож қилган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.