Vengriya O‘zbekistondagi xususiylashtirish jarayoniga jalb qilinadi
30-sentabr kuni O‘zbekiston hukumat delegatsiyasining Vengriyaga tashrifi doirasida investitsiyalar va tashqi savdo vaziri Jamshid Xo‘jayev Vengriya tashqi ishlar va tashqi iqtisodiy aloqalar vazirining birinchi o‘rinbosari Levente Magyar bilan muzokaralar o‘tkazdi. Bu haqda vazirlik axborot xizmati xabar qildi.
Qayd etilishicha, uchrashuv davomida savdo-iqtisodiy, investitsiyaviy, ilmiy-texnikaviy va innovatsion sohalarda ko‘p qirrali o‘zbek-venger hamkorligini rivojlantirish istiqbollari muhokama qilingan.
Xususan, tomonlar qishloq xo‘jaligi, suvni tejaydigan texnologiyalar, oziq-ovqat sanoati, farmatsevtika, elektronika, avtomobilsozlik, to‘qimachilik, kimyo va metallurgiya, ilm-fan, innovatsiya va ta’lim kabi sohalarda yangi yuqori daromadli investitsiya loyihalari va savdo shartnomalarini ishlab chiqishni o‘z ichiga olgan qisqa va o‘rta muddatli istiqbolga mo‘ljallangan iqtisodiy masalalarni to‘liq ko‘rib chiqqan.
Sanoat kooperatsiyasi, transport va logistika, hududlararo hamkorlikni rivojlantirish, shuningdek, Vengriya sarmoyaviy doiralarini O‘zbekiston davlat korxonalari va aktivlarini transformatsiyalash va xususiylashtirish jarayoni jalb qilish istiqbollari alohida tartibda muhokama qilingan.
Uchrashuv yakunida to‘g‘ridan to‘g‘ri aloqalarni qo‘llab-quvvatlash va ko‘p qirrali sheriklik yo‘nalishlarida o‘zaro hamkorlikni mustahkamlashga kelishilgan.
Shu kunning o‘zida Jamshid Xo‘jayevning Wizz Air, “MasterGood”, “KITE”, “Eximbank”, “Rába” kabi yetakchi venger kompaniyalari va banklari rahbariyati bilan uchrashuvi bo‘lib o‘tgan. Unda hamkorlik aloqalarini o‘rnatish va qo‘shma investitsiya loyihalarini amalga oshirish imkoniyatlari muhokama qilingan.
