Dubayda hunarmandchilik mahsulotlarini sotishga ixtisoslashgan o‘zbek do‘konlari ochiladi

Birlashgan Arab Amirliklariga amaliy safar bilan borgan O‘zbekiston “Hunarmand” uyushmasi raisi Ulug‘bek Abdullayev qator ikki tomonlama muzokaralar o‘tkazdi, deb xabar bermoqda “Dunyo” axborot agentligi.

Xususan, O‘zbekiston elchixonasi ko‘magida Sheikh Zayed Grand Mosque majmuasi rahbariyati bilan uchrashuv tashkil etilgan. Unda har yil noyabr va mart oylarida Abu Dabi amirligida bo‘lib o‘tadigan “Shayx Zoid” festivalida O‘zbekiston pavilyonini tashkil etish va o‘zbek hunarmandchiligi mahsulotlarini targ‘ib qilish masalalari muhokama qilingan.

Shuningdek, Abu-Dabi va Dubay shaharlaridagi yirik savdo markazlarida o‘zbek hunarmandchilik mahsulotlari do‘konlarini tashkil etish yuzasidan fikr almashilgan.

“Precise group” kompaniyalar guruhi prezidenti L.Xoxman bilan bo‘lib o‘tgan uchrashuvda kompaniyaning esdalik sovg‘alarini ishlab chiqarish imkoniyatlarini O‘zbekistonda yo‘lga qo‘yish masalalari muhokama qilingan.

Muzokaralar natijasida joriy oyda Dubay xalqaro aeroportiga tutash hududda “Precise group” kompaniyasiga tegishli savdo maydonida o‘zbek hunarmandchilik mahsulotlari do‘konini tashkil etishga to‘g‘risida kelishuvga erishilgan.