O‘zbekiston to‘qimachilik mahsulotlarining Britaniyaga eksporti kengaytiriladi
O‘zbekistonning Londondagi elchixonasi vakillari Buyuk Britaniya moda va to‘qimachilik assotsiatsiyasining (UK Fashion & Textile Association, UKFT) xalqaro hamkorlik departamenti direktori Pol Anger bilan muzokaralar o‘tkazdi, deb xabar bermoqda “Dunyo” axborot agentligi.
Qayd etilishicha, uchrashuvda “O‘zto‘qimachiliksanoat” uyushmasi xalqaro aloqalar bo‘limi boshlig‘i Shahzoda Qo‘chqorova va UKFT loyihasi koordinatori Daniel Konolli ishtirok etgan. Muzokaralardan maqsad o‘zbek to‘qimachilik mahsulotlarini Britaniya bozoriga eksport qilishni kengaytirish, britaniyalik riteylerlarni O‘zbekistonda ishlab chiqarish jarayoniga jalb etish masalalarini muhokama qilishdan iborat bo‘lgan.
O‘zbekistonning yirik brendlari va korxonalari hamda “ASOS”, “boohoo”, “Very”, “Net-a-Porter”, boshqa yirik riteylerlar o‘rtasida muloqotni yo‘lga qo‘yish, ko‘rgazma va boshqa tadbirlarni tashkil qilishda katta tajribaga ega mutaxassislar bilan hamkorlikni yo‘lga qo‘yish imkoniyatlari o‘rganilgan.
Shuningdek, to‘qimachilik sohasidagi yetakchi ta’lim markazlari hisoblangan Xorfild (University of Horrefield) va Bredford (University of Bradford) shaharlari universitetlari bilan hamkorlikni yo‘lga qo‘yishga ko‘maklashishga tayyorlik bildirilgan.
Britaniya moda va to‘qimachilik assotsiatsiyasi (UK Fashion & Textile Association, UKFT) 2009-yilda Britaniya kiyim-kechak sanoati assotsiatsiyasi (BCIA) va “UK Fashion Exports” assosiatsiyasi qo‘shilishi natijasida tashkil topgan. Hozirgi kunga UKFTga 800 dan ortiq korxona va kompaniyalar a’zo. Assosiatsiya moda va to‘qimachilik mahsulotlarini yetkazib berish zanjirining bir qismi bo‘lgan dizaynerlar, ishlab chiqaruvchilar, yetkazib beruvchilar, ulgurji va chakana sotuvchilarini birlashtiradi.
