Burkina-Fasoda harbiylar yil boshidan beri ikkinchi marta davlat to‘ntarishini amalga oshirdi
Burkina-Fasoda yil boshidan beri ikkinchi harbiy to‘ntarish sodir bo‘ldi, deb xabar bermoqda leFaso.
Natijada mamlakatni boshqarayotgan podpolkovnik Pol-Anri Sandaogo Damiba hukumatdan ag‘darildi. Davlat to‘ntarishidan avval poytaxt Uagaduguning bir qancha hududlarida otishma sodir bo‘lgan.
Hokimiyatni kapitan Ibrohim Traore egalladi. U konstitutsiya va siyosiy faoliyat to‘xtatilishi, hukumat va parlament tarqatilishi, chegaralar yopilishi haqida e’lon qildi. Bundan tashqari, mamlakatda soat 21:00 dan 05:00 gacha komendantlik soati joriy etildi.
Reuters xabariga ko‘ra, Damibaning ag‘darilgani haqida harbiylar 30-sentabr kuni kechqurun televideniye orqali ma’lum qilgan. Uning qayerdaligi noma’lum.
Traorening so‘zlariga ko‘ra, qishki davlat to‘ntarishida Damibaning hokimiyatga kelishiga yordam bergan harbiy guruh uni jangarilar bilan kurasha olmagani uchun lavozimidan chetlashtirishga qaror qilgan. Xuddi shu sababga ko‘ra, Damiba ham o‘zidan oldingi Rok Mark Kaborni ag‘dargan edi.
Burkina-Faso G‘arbiy Afrikadagi eng qashshoq mamlakatlardan biri bo‘lib, aholisi taxminan 22 million kishini tashkil etadi, aholi jon boshiga yalpi ichki mahsulot esa yiliga 988,3 dollarga teng. Reuters agentligiga ko‘ra, “Al-Qoida” va ISHID tashkilotlarining jangarilari mamlakat hududining bir qismini nazorat qilmoqda.
Yanvar oyi oxirida Burkina-Faso harbiylari televideniye orqali mamlakatda harbiy to‘ntarish bo‘lganini e’lon qilgandi. Kabore ag‘darilib, hokimiyat Damibaga o‘tgan. O‘shanda Kabore suiqasddan omon qolgan edi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
