Belgiya ukrainalik harbiylarni o‘qitishga tayyorligini bildirdi

Belgiya mudofaa vaziri Lyudivin Dedonder federal parlamentdagi tinglovda Belgiya Ukraina harbiylarini o‘qitish bo‘yicha Yevropa Ittifoqi boshchiligidagi missiyada ishtirok etishga tayyorligini ma’lum qildi.

“Ixtiyorimizdagi mablag‘ bilan qo‘limizdan kelganini qilyapmiz”, — deb tushuntirdi u deputatlarning savollariga javob berar ekan.

Vazirning aytishicha, Kiyevga Belgiya armiyasi zaxirasidan harbiy ko‘rsatilgan, Ukraina hukumati esa qirollikning mudofaa korxonalari bilan aloqada. Uning fikricha, Yevropa Ittifoqi davlatlari o‘rtasida kim ko‘proq yordam yetkazish bo‘yicha raqobat boshlash mantiqqa to‘g‘ri kelmaydi.

“Har kim qo‘lidan kelganini bermoqda”, — dedi Dedonder.

Uning ta’kidlashicha, Belgiya ukrainalik harbiylarni tayyorlashga quruqlik va dengiz hududlarini minalardan tozalash, logistika, muhandislik va boshqa mutaxassisliklar bo‘yicha hissa qo‘shadi.

Vazirning so‘zlariga ko‘ra, Belgiyaning Ukrainaga harbiy yordami allaqachon 51 million yevroga yetgan. Tez orada 12 millionlik asbob-uskunalar Ukrainaga jo‘natish uchun Polshaga yetkaziladi. Dedonder ushbu yuk tarkibi haqida batafsil ma’lumot bermadi. Ammo milliy OAV gap og‘ir pulemyotlar va o‘q-dorilar haqida ketayotganini xabar qilgandi.