O‘zbekiston terma jamoasi qo‘shib berilgan daqiqalarda urilgan gollar tufayli Kosta-Rikaga mag‘lub bo‘ldi
Futbol bo‘yicha O‘zbekiston milliy terma jamoasi 27-sentabr, seshanba kuni Janubiy Koreyaning Suvon shahrida Kosta-Rikaga qarshi o‘rtoqlik o‘yinida maydonga tushdi.
Uchrashuvning 26-daqiqasida Eldor Shomurodov raqib darvozabon bilan birga bir vaziyatga chiqib bordi va aniq zarbasi bilan hisobni ochdi.
Tanaffusga qadar va ikkinchi bo‘limda ham O‘zbekiston vakillarida qator imkoniyatlar yuzaga keldi, biroq raqib darvozasi boshqa ishg‘ol etilmadi. Hakam tomonidan qo‘shib berilgan vaqtda Entoni Ernandes muvozanatni tikladi. So‘nggi soniyalardagi standart vaziyatdan keyin Kendall Uoston Kosta-Rikaga g‘alaba keltirgan golga muallif bo‘ldi.
Qayd etish kerak, Kosta-Rika Qatarda o‘tadigan JCH—2022 da ishtirok etadi. Shimoliy Amerika vakili E guruhida Ispaniya, Germaniya va Yaponiyaga qarshi o‘ynaydi.
Srechko Katanes shogirdlari 22-sentabr kuni JCH—2022 ning yana bir ishtirokchisi Kamerunga qarshi o‘rtoqlik o‘yini o‘tkazgan va unda 2:0 hisobida g‘alaba qozongandi.
O‘rtoqlik o‘yini
27-sentabr, seshanba
O‘zbekiston — Kosta-Rika 1:2
Gollar: 1:0 – 26 Shomurodov, 1:1 – 90+2 Ernandes, 1:2 – 90+4 Uoston.O‘zbekiston: O‘tkir Yusupov, Umar Eshmurodov, Husniddin Aliqulov, Sherzod Nasrullayev (Farrux Sayfiyev, 72), Hojiakbar Alijonov, Otabek Shukurov, Odil Hamrobekov, Sardor Sobirxo‘jayev (Akmal Mozgovoy, 72), Aziz Turg‘unboyev (Ibrohimxalil Yo‘ldoshev, 57), Hojimat Erkinov (Oybek Bozorov, 57), Eldor Shomurodov (Igor Sergeyev, 72).
Kosta-Rika: Aaron Krus (Patrik Sekeyra, 46), Xuan Pablo Vargas, Keysher Fuller, Brayan Ovedo (Karlos Martines, 66), Joxan Venegas (Entoni Kontreras, 66), Orlando Galo, Aron Suares (Entoni Ernandes, 74), Kendall Uoston, Brandon Agilera (Brayan Ruis, 46), Karlos Mora (Alvaro Zamora, 46), Duglas Lopes.
Ogohlantirishlar: Hamrobekov (28), Agilera (34), Fuller (36), Zamora (50), Yo‘ldoshev (81).
