Yevropa Ittifoqi Putinning tahdidlaridan keyin neft narxini cheklashga shoshilmoqda — Bloomberg
Yevropa Ittifoqi (YI) Rossiyaga qarshi yangi sanksiyalar paketi doirasida Rossiya neftiga narxning yuqori chegarasini joriy etish imkoniyatini o‘rganmoqda. Bu haqda Bloomberg xabar berdi.
Agentlikka ko‘ra, YI davlatlari bu borada bir necha hafta ichida kelishuvga erishmoqchi.
Prezident Vladimir Putinning qisman safarbarlik haqidagi qarori, shuningdek, Donbassni Rossiya tarkibiga qo‘shish bo‘yicha rejalashtirilgan referendumlar fonida yangi cheklovlar muhokamasi tezlashtirildi.
Narxlarning yuqori chegarasi bo‘yicha kelishib olish qiyin, chunki Yevropa Ittifoqi mamlakatlarida energetikaga bo‘lgan ehtiyoj darajasi har xil.
Bundan tashqari, neftning ruxsat etilgan maksimal narxi qancha bo‘lishi va bu chora YIning 5-dekabrdan kuchga kiradigan Rossiya neftiga nisbatan allaqachon kelishilgan embargosi bilan birga qanday amalga oshirilishi hozircha ma’lum emas.
Yevropa Ittifoqi vakillari dam olish kunlari Yevropa komissiyasi bilan uchrashib, yangi sanksiyalarni muhokama qiladi.
Bloomberg’ga ko‘ra, neftga nisbatan cheklovlardan tashqari yana bir qancha shaxslarga, shuningdek, texnologiyalar va hashamatli tovarlarga nisbatan sanksiyalar ko‘rib chiqilmoqda.
G7 davlatlari allaqachon Rossiya neftining narx chegarasi bo‘yicha kelishib olgan. Ushbu mexanizm doirasida 5-dekabrdan Rossiya neftini dengiz orqali tashishni taqiqlash, 2023-yil 5-fevraldan neft mahsulotlarini tashishni taqiqlash joriy etiladi.
Yevropa Ittifoqining 15 ta davlati ham gaz narxlari bo‘yicha umumiy chegarani belgilashni talab qildi, biroq bu borada kelishib bo‘lmadi. Rossiya Energetika vazirligi gaz yoki neftni cheklangan narxda sotishni istisno qildi.
