O‘zbekistonda endi ipoteka kreditini to‘lash uchun yo‘naltirilgan mablag‘lar daromad solig‘iga tortilmaydi

O‘zbekiston Respublikasi prezidenti “Ipoteka kreditidan foydalanishda aholiga qo‘shimcha qulayliklar yaratish chora-tadbirlari to‘g‘risida”gi qarorni imzoladi. Bu haqda Davlat soliq qo‘mitasi xabar qildi.

Unga ko‘ra, 2023-yil 1-yanvardan boshlab dastlabki badalning va ipoteka krediti bo‘yicha foizlarning bir qismini qoplash uchun subsidiya berilgan fuqarolarning uy-joylarni sotib olish, qurish yoki rekonstruksiya qilish uchun olingan ipoteka kreditlarini hamda ular bo‘yicha hisoblangan foizlarni to‘lash uchun yo‘naltirilgan ish haqi va boshqa daromadlari jismoniy shaxslardan olinadigan daromad solig‘iga tortilmaydi.

Ushbu imtiyoz qarz oluvchi va birgalikda qarz oluvchilarga bir soliq davrida eng kam ish haqining 80 baravaridan oshmaydigan daromadi bo‘yicha qo‘llaniladi. Ya’ni ipoteka kreditlarini to‘lash uchun ajratiladigan daromadlarning umumiy miqdori yiliga 73,6 million so‘mdan oshmasligi kerak.

2023-yildan boshlab ipoteka krediti hisobiga sotib olingan, qurilgan va rekonstruksiya qilingan mol-mulk unga bo‘lgan huquq davlat ro‘yxatidan o‘tkazilgan sanadan e’tiboran 36 oy ichida begonalashtirilganda, mazkur daromadlar belgilangan tartibda soliqqa tortiladi.