9-sinf adabiyot darsligida keltirilgan “narmoda” so‘zi izohi muhokamalarga sabab bo‘ldi (video)

9-sinf adabiyot fani darsligida keltirilgan “narmoda” so‘ziga berilgan izoh ijtimoiy tarmoqlarda muhokamaga sabab bo‘lgandi. Respublika ta’lim markazi mazkur vaziyatga munosabat bildirdi.

Qayd etilishicha, amalda foydalanilayotgan, ijtimoiy tarmoqlarda tarqalgan videoda ko‘rsatilgan 9-sinf adabiyot darsligi 2019-yilda “O‘zbekiston” nashriyot-matbaa ijodiy uyi tomonidan chop etilgan. Mazkur darslik 4-nashr bo‘lib, maket 2004-yilda nashriyot tomonidan mualliflarni jalb qilgan holda yaratilgan.

Darslikning 23-sahifasidagi “narmoda” so‘zi “Alpomish” o‘zbek xalq dostonidan olingan bo‘lib, doston qahramonlaridan biri Qaldirg‘och tomonidan Hakimbiyni unga kelgan xatdagi iltimosni bajo keltirishga da’vat qilish, Alpomishning yigitlik or-nomusini uyg‘otish maqsadida ishlatilgan.

Bu jihatni darslik bosh muallifi Qozoqboy Yo‘ldoshevning “Alpomish” dostonida “narmoda” so‘zining ishlatilishi yuzasidan talabalarga bergan izohida ham ko‘rish mumkin.

Aytish joizki, dostondagi mazkur parcha va “narmoda” so‘zining izohi darslik mualliflarining talabiga ko‘ra darslikda o‘zgarishsiz qoldirilgan. Yangi avlod darsliklarini yaratish rejasiga asosan Milliy o‘quv dasturiga o‘tish doirasida 9-sinflar uchun adabiyot darsligining 2024-yilda yangilanishi belgilangan, — deyiladi munosabatda.