“Bu — ko‘zbo‘yamachilik”. Yakkabog‘lik deputatlar viloyat hokimi o‘rinbosari boshchiligidagi mas’ullar ishini tanqid qildi

Xalq deputatlari Yakkabog‘ tuman kengashi kotibiyati boshchiligidagi ishchi guruh viloyat hokimi o‘rinbosari Rustam Yo‘ldoshev va tuman hokimi Lutfiddin Abdullayev boshchiligida ochilgan ixtisoslashtirilgan maktab ta’mirini ko‘zbo‘yamachilik deb atadi. Bu haqda kotibiyatning Telegram’dagi rasmiy sahifasida ma’lumot berilgan.

Qayd etilishicha, kommunal soha va aholiga xizmat ko‘rsatish masalalari bo‘yicha doimiy komissiya, tuman deputatlari, tumandagi tashkilot vakillaridan iborat ishchi guruh “Mevazor” MFYda joylashgan ixtisoslashtirilgan maktabning yangi o‘quv yiliga tayyorgarligini ko‘zdan kechirgan.

“Prezidentimizning ‘Prezident ta’lim muassasalari agentligi tizimidagi ixtisoslashtirilgan maktablar tarmog‘ini kengaytirish to‘g‘risida’gi 2022-yil 14-aprel kuni qabul qilingan farmoni ijrosini ta’minlash, shuningdek, ixtisoslashtirilgan maktab-internatlar va ixtisoslashtirilgan maktablar faoliyatini samarali tashkil etish maqsadida Yakkabog‘ tumanida yaqinda tashkil etilgan, tantanali ochilishi bo‘lib o‘tgan ixtisoslashtirilgan maktabdagi ta’mirlash ishlari bilan tanishdik. Tanishish jarayonida bir qator kamchiliklar aniqlandi. Jumladan ixtisoslashtirilgan maktab qurilishi oxirigacha yetkazilmagan. Bino uch qavatdan iborat bo‘lib, uchinchi qavati umuman ta’mirtalab ahvolda”, — deyiladi kotibiyat axborotida.

Ma’lumot berilishicha, ixtisoslashtirilgan maktab ta’miri uchun davlat budjetidan 6 milliard 500 million so‘m mablag‘ ajratilgan bo‘lib, bu mablag‘lar hanuzgacha quruvchi tashkilot hisob raqamiga o‘tkazib berilmagan.

“Natijada ixtisoslashtirilgan maktab uchun ajratilgan mebel jihozlari olib kelinmagan, o‘quvchilari va o‘qituvchilari foydalanishi lozim bo‘lgan kutubxonalar kerakli mebellar bilan jihozlanmagan. Oshxona ta’miri chala qolib, ishga tushirilmagan. O‘quvchilar yashashi uchun yotoqxonalar mavjud emas. Stadion, sport zallari, o‘quv yili uchun umuman tayyor emas. Umuman olganda ixtisoslashtirilgan maktabda hech qanday ta’mirlash ishlari amalga oshirilmagan”, — deyiladi deputatlar fikri berib boriluvchi rasmiy kanalda.

Kotibiyat mas’ullaridan iborat ishchi guruh ta’mirtalab maktabning tantanali ochilishini ko‘zbo‘yamachilik deb nomladi.

“O‘quv yili boshlanishi avvalida ‘ura-ura’chilik bilan ‘prezident maktabi’ning bunday holatda ochilishi ko‘zbo‘yamachilikdan boshqasi emas. Mas’ul tashkilotlar bu holatga nega jim qarab turibdi? Prezidentimizning mamlakatimizdagi yoshlar uchun shunchalik jon kuydirib chiqargan qaror va farmonlari joylarda ijro etilmasdan qolib ketyaptimi? Maktab direktori nega bu holatga jim qarab turibdi? Bundan kim manfaatdor? Tuman hokiming yoshlar siyosati va ijtimoiy masalalar bo‘yicha o‘rinbosari bu holatga nima deb javob beradi? Ishchi guruh azolari bu kabi savollarga javob kutib, yana biroz fursatdan so‘ng ushbu maktabda o‘rganish ishlarini olib boradi”, — deydi o‘rganuvchilar.